1. ఊజు దేశమున యోబు అను పేరుగల నరుడొకడు ఉండెడివాడు. అతడు ఋజువర్తనుడును, న్యాయవంతుడును మరియు దేవునిపట్ల భయభక్తులు కలిగి, పాపమునకు దూరముగా ఉండువాడు.
2. అతనికి ఏడుగురు కుమారులు, ముగ్గురు కుమార్తెలు కలిగిరి.
3. అతనికి ఏడువేల గొఱ్ఱెలు, మూడువేల ఒంటెలు, ఐదు వందల జతల ఎద్దులు, ఐదువందల ఆడుగాడిదలు, చాలమంది సేవకులుండిరి. తూర్పు దేశీయులందరికంటే అతడు మహాసంపన్నుడు.
4. యోబు కుమారులు తమ ఇండ్లలో వంతులవారిగా విందులు ఏర్పాటు చేసెడివారు. వారు ఆ విందులను తమ ముగ్గురు ఆడు తోబుట్టువులతో కలిసి అన్నపానీయములు ఆరగించుటకు ఆహ్వానించెడివారు.
5. వారివారి విందుదినములు ముగియగనే యోబు కుమారులను పిలిపించి శుద్ధిచేయించెడివాడు. వేకువనే లేచి ఒక్కొక్కపుత్రుని కొరకు దహనబలిని అర్పించి, ఒకవేళ తన కుమారులు పొరపాటున దేవుని నిందించి పాపము కట్టుకొనిరేమోయని భయపడి, వారి నిమిత్తము ప్రాయశ్చిత్తము చేసెడివాడు. ఇట్లు యోబు ఎల్లప్పుడును చేయుచుండెడివాడు.
6. ఒక దినము దేవదూతలు దేవుని సమక్షమునకు వచ్చిరి. వారితోపాటు సాతానుకూడ వచ్చెను. వచ్చిరి. వారితోపాటు సాతానుకూడ వచ్చెను.
7. దేవుడు సాతానుని నీవు ఎక్కడనుండి వచ్చితివి అని అడుగగా అతడు నేను భూలోకమున అటునిటు సంచారము చేసి వచ్చితిని అని ప్రత్యుత్తరమిచ్చెను.
8. దేవుడతనితో “నీవు నా సేవకుడైన యోబును చూచితివా? అతడు ఋజువర్తనుడును, న్యాయవంతుడును మరియు దేవునిపట్ల భయభక్తులు కలిగి, పాపమునకు దూరముగా ఉండువాడు. అట్టివాడు మరియొకడు భూలోకమునలేడు” అనెను.
9. అతని గురించి నీవెప్పుడైనా ఆలోచించితివా? అని అడుగగా, సాతాను దేవునితో "యోబు ఉట్టినే దేవుని యందు భయభక్తులు చూపువాడా?
10. నీవు అతనికిని, అతని కుటుంబమునకును, అతని సిరిసంపదలకును చుట్టు కంచెవేసి కాపాడుచున్నావు కదా? నీవు అతడు చేపట్టిన కార్యములనెల్ల దీవించుటచే, అతనికున్నదెల్ల దేశములో బహుగా వృద్ధిచెందినది.
11. అయినను నీవు ఇపుడు నీ చేయిచాపి అతనికి కలిగిన సమస్తమును మొత్తినచో, నీ ముఖముననే నిన్ను దూషించి నిన్ను విడనాడును” అని పలుకుగా
12. దేవుడు సాతానుతో “సరియే, అతనికి కలిగిన సమస్తమును నీ ఆధీనమున నున్నది. నీవు మాత్రము అతనిమీద చేయిచేసికోవలదు” అని చెప్పెను. అంతట సాతాను దేవునిసన్నిధినుండి వెడలి పోయెను.
13. ఒక దినము యోబు కుమారులు, కుమార్తెలు వారి పెద్దన్న ఇంట విందును ఆరగించుచు ద్రాక్షసారాయములను సేవించుచుండిరి.
14. అప్పుడు సేవకుడొకడు యోబు చెంతకు వచ్చి "అయ్యా! నీ ఎడ్లు పొలము దున్నుచున్నవి. వాని ప్రక్కనే నీ గాడిదలు మేయుచున్నవి.
15. ఇంతలో షబాయీయులు వచ్చి పడి ఆ పశువులన్నిటిని తోలుకొనిపోయిరి. వారు నీ సేవకులనెల్ల ఖడ్గములతో పొడిచి చంపివేసిరి. నేనొక్కడనే తప్పించుకొని వచ్చి నీకు ఈ సంగతి చెప్పుచున్నాను” అనెను.
16. అతడు తన మాటలను ముగించెనో లేదో మరియొక సేవకుడు వచ్చి "అయ్యా! ఆకాశము నుండి ఒక మెరపువచ్చి నీ గొఱ్ఱెలను వాని కాపరులను కాల్చి వేసినది. నేనొక్కడనే తప్పించుకొని వచ్చి నీకు ఈ వార్త తెలుపుచున్నాను” అని పలికెను.
17. అతడు తన మాటలను ముగింపకమునుపే వేరొక సేవకుడు వచ్చి “అయ్యా! కల్దీయులు మూడుదండులుగా వచ్చి నీ ఒంటెలమీదపడి వానిని అపహరించుకొనిపోయిరి. వారు నీ సేవకులను కూడ కత్తులతో పొడిచి చంపి వేసిరి. నేనొక్కడనే తప్పించుకొని వచ్చి నీకు ఈ విషయమును తెలియజేయుచున్నాను" అని పలికెను.
18. అతడు తన పలుకులను ముగింపక పూర్వమే ఇంకొక సేవకుడు వచ్చి “అయ్యా! నీ కుమారులు, కుమార్తెలు వారి పెద్దన్న ఇంట విందారగించుచు ద్రాక్షసారాయమును సేవించుచుండిరి.
19. అంతలో ఎడారినుండి ఒక ప్రచండమైన సుడిగాలివచ్చి ఆ ఇంటి నాలుగుమూలలను బాదెను. ఇల్లుకూలి యువకుల మీద పడగా వారందరును చనిపోయిరి. నేనొక్కడనే తప్పించుకొని వచ్చి నీకు ఈ సంగతి విన్నవించుకొనుచున్నాను” అని పలికెను.
20. ఆ మాటలు విని యోబు లేచి సంతాప సూచకముగా పై వస్త్రమును చించుకొనెను. తల గొరిగించుకొనెను. నేలపై బోరగిలపడి దేవునికి దండము పెట్టి:
21. “నేను దిగంబరుడనుగానే తల్లి కడుపు నుండి వెలువడితిని, దిగంబరుడనుగానే ఇచ్చటి నుండి వెడలిపోయెదను. ప్రభువు ఇచ్చెను, ప్రభువే తీసుకొనెను. ప్రభువు నామమునకు స్తుతి కలుగునుగాక!” అని పలికెను.
22. ఇన్ని దురదృష్టములును వాటిల్లి నను యోబు ఏ పాపమును కట్టుకొనలేదు, దేవుడు అన్యాయము చేసెను అని పెదవులతో సైతము పలుకలేదు.
1. దేవదూతలు మరల దేవుని సమక్షమునకు వచ్చిరి. వారితోపాటు సాతానుకూడ వచ్చెను
2. దేవుడు సాతానుని నీవు ఎక్కడనుండి వచ్చితివి అని అడుగగా అతడు నేను భూలోకమున అటునిటు సంచారము చేసి వచ్చితిని అని ప్రత్యుత్తరమిచ్చెను.
3. దేవుడతనితో “నీవు నా సేవకుడైన యోబును చూచితివా? అతడు ఋజువర్తనుడును, న్యాయవంతు డును మరియు దేవునిపట్ల భయభక్తులు కలిగి, పాపమునకు దూరముగా ఉండువాడు. అట్టివాడు మరియొకడు భూలోకమునలేడు. నీవే నిష్కారణముగా నాచే అతనిని నాశనము చేయుటకు నన్ను ప్రేరేపించినను, అతడు ఇంకను తన నీతిని వదలక, తన నడవడికలో నిలకడగా ఉన్నాడు” అనెను.
4.సాతాను “నరుడు తన చర్మమును కాపాడుకొనుటకు చర్మమును, తన ప్రాణములను దక్కించుకొనుటకు సమస్తమును త్యజించును.
5. ఇంకొకసారి నీవు చేయిచాపి అతని దేహమును మొత్తినయెడల, అతడు నీ ముఖమెదుటనే నిన్ను దూషించి నిన్ను విడనాడును” అని పలికెను.
6. దేవుడు సాతానుతో “సరియే. యోబును నీ ఆధీనమున ఉంచుచున్నాను. నీవు అతని ప్రాణము జోలికి మాత్రము పోవలదు” అని చెప్పెను.
7. అంతట సాతాను దేవుని సమక్షమునుండి వెడలిపోయెను. అతడు యోబును అరికాలినుండి నడినెత్తివరకు వ్రణములతో నింపెను.
8. యోబు కసవు దిబ్బమీద కూర్చుండి చిల్లపెంకుతో తన ప్రణములను గోకుకొన నారంభించెను.
9. అతని భార్య “నీవింకను యదార్థత తను వదలవా? దేవుని దూషించి మరణించుము” అనెను.
10. అందుకు యోబు “నీవు మూరురాలు మాట్లాడినట్లు మాట్లాడుచున్నావు. దేవుడు మనకు మేలులు దయచేసినపుడు స్వీకరించితిమి, మరి కీడు లను పంపినపుడు స్వీకరింపవలదా?” అనెను. ఇన్ని దురదృష్టములు వాటిల్లినను, యోబు ఏ పాపమును కట్టుకొనలేదు, దేవుడు అన్యాయము చేసెను అని పెదవులతో సైతము పలుకలేదు.
11. యోబునకు దుర్దినములు ప్రాప్తించినవని అతడి ముగ్గురు స్నేహితులు విని, అతనికొరకు దుఃఖించు టకును, అతనిని ఓదార్చుటకును వారు తమతమ పట్టణములనుండి బయలుదేరిరి. వారు తేమాను నగరవాసి ఎలీఫసు, షూహా దేశీయుడు బిదు, నామా దేశీయుడు సోఫరు. వారు మువ్వురు ఒకచోట కలిసి కొని, యోబు వద్దకు పోవుటకు నిర్ణయించుకొనిరి.
12. ఆ మిత్రులు యోబుని దూరమునుండి చూచిరి. కాని అతడిని గుర్తుపట్టజాలరైరి. కనుక వారు పెద్దగా శోకించి బట్టలు చించుకొని, తలమీద దుమ్ము చల్లుకొనిరి.
13. వారు యోబు ప్రక్కనే నేలమీద చతికిలబడి ఏడురాత్రులు, ఏడు పగళ్ళు మౌనము వహించిరి. యోబు తీవ్రమైన బాధను అనుభవించుచుండెనని గ్రహించి ఆ స్నేహితులతడితో ఒక్క పలుకైనను పలుకజాలరైరి.
1. కడన యోబు నోరు విప్పెను.
2. అతడు తాను పుట్టిన దినమును శపించుచు ఇట్లనెను:
3. “నా తల్లి గర్భద్వారమును అది మూయనందుకు నా నేత్రములకు అది బాధను మరుగుచేయనందులకు నేను పుట్టినదినము లేకపోవునుగాక! 'ఒక మగబిడ్డ ఆమె కడుపునపడెను'. అని ఒకడు చెప్పిన రేయి లేకపోవునుగాక!
4. పైనున్న దేవుడు ఆ రోజును స్మరింపకుండుగాక! ఆ దినము అంధకారబంధురమగుగాక! దానికి వెలుగు ప్రాప్తింపకుండుగాక!
5. తమస్సును, మృత్యుఛాయయు దానిని కప్పివేయుగాక! మేఘము దానినావరించుగాక! దానికి సూర్యప్రకాశము కలుగకుండుగాక!
6. చీకట్లు ఆ రేయిని అలముకొనుగాక! దానిని సంవత్సర దినములలో గణింపకుందురుగాక! . మాసదినములలో లెక్కింపకుందురు గాక!
7. ఆ రేయి గొడ్డుబోవుగాక! ఆ రాత్రి ఆనందనాదమేదియు విన్పింపకుండుగాక!
8. సముద్రభూతమును మేలుకొల్పు మాంత్రికులు ఆ రేయిని శపింతురుగాక!
9. ఆ రాత్రి సంధ్యానక్షత్రకాంతిని కోల్పోవును గాక! దానికి ప్రకాశము సోకకుండుగాక! వేకువ వెలుగు ప్రాప్తింపకుండుగాక!
10. ఆ రేయి మా తల్లి గర్భకవాటమును మూసివేసి నాయీశోకమును వారింపజాలదయ్యెను.
11. నేను మా తల్లి కడుపున ఉన్నపుడే యేల చావనైతిని? లేదా, పురిటిలోనే యేల కన్నుమూయనైతిని?
12. మా అమ్మ నాడు మోకాళ్లూని నన్ను స్వీకరింపనేల? స్తన్యమిచ్చి నన్ను పోషింపనేల?
13. నేనప్పుడే చనిపోయి ఉండినచో ఇప్పుడు శాంతికి నిలయమైన సుఖనిద్రను అనుభవించుచుండెడి వాడనేకదా!
14. తమ కొరకు బీడుభూములయందు భవనములు నిర్మించుకొనిన రాజులతోను, మంత్రులతోను కలిసి నిద్రించుచుండెడివాడనేకదా!
15. తమ భవనములో వెండిబంగారములు కూడబెట్టుకొనిన రాజకుమారులతో కలిసి శయనించుచుండెడివాడనే కదా!
16. తల్లి కడుపునుండి చనిపోయిపుట్టి , వెలుగు కాంచజాలని మృతపిండముతో కలిసి నిద్రించుచుండెడివాడనే కదా!
17. ఆ పాతాళలోకమున దుర్మార్గులితరులను పీడింపజాలరు. అచట అలసిపోయిన పనివారు విశ్రాంతి చెందుదురు.
18. అక్కడ బందీలుకూడ అధికారి ఆజ్ఞలకు గురికాక విశ్రాంతిని అనుభవింతురు.
19. అచట అధికులు, అల్పులు కూడ ఉందురు. యజమానుల పీడ విరగడైన సేవకులు ఉందురు
20. ప్రభువు విచారగ్రస్తులకు వెలుగు ఈయనేల? దుఃఖితులకు జీవనభాగ్యము దయచేయనేల?
21. వారు మృత్యువు కొరకు వేచియున్నను, అది వారి చెంతకు రాదు, నిధికొరకువలె చావుకొరకు గాలించినను అది వారికి దొరకదు.
22. వారు తమ సమాధిని గాంచి ఆనందింప గోరుదురు. తమ గోరీని చేరుకొని సంతసింపగోరుదురు.
23. కన్నులతో మార్గముచూడలేని వానికి, దేవుడు చుట్టుకంచెవేసిన వానికి వెలుగునివ్వనేల? ఆ మార్గములన్నీ నిరోధించినచో, వానికి వెలుగేల?
24. సంతాపమే నాకు ఆహారమైనది. నా నిట్టూర్పులకు అంతమేలేదు.
25. నేను దేనికి వెరతునో, దేనిని గూర్చి భయపడుదునో, అదియే నాకు జరుగుచున్నది.
26. నాకు శాంతిసమాధానములు లేవు నా శ్రమలకు అంతము లేదు.”
1. అటు తరువాత తేమాను నగరవాసి ఎలీఫసు మాట్లాడుచు ఇట్లనెను:
2. "అయ్యా! నేను మాటలాడినచో నీకు బాధ కలుగదుగదా! | నేను ఇక మౌనము వహింపజాలను.
3. పూర్వము నీవు చాలమందికి సద్బోధ చేసి బలహీనమైన చేతులను బలపరిచినవాడవు
4. కాలుజారి పడువారికి నీ మాటలు సత్తువ నొసగెను. కాళ్ళు వణకువారికి నీ పలుకులు ధైర్యము నొసగెను.
5. కాని ఇప్పుడు నీ వంతు రాగా నీవు ధైర్యము కోల్పోయితివి. ఆ బాధలు నిన్ను పట్టి పీడింపగా నీవు దుఃఖితుడవైతివి.
6. నీ దైవభీతి నీ కేల నమ్మకము పుట్టింపలేదు? యదార్ధవర్తనమైన నీ జీవితము నీకేల ఓదార్పు నొసగలేదు?
7. ఋజువర్తనుడు నాశనమగుటగాని న్యాయవంతుడు చెడుటగాని నీవు ఎన్నడైన కంటివా?
8. నేను చూచిన సంగతి చెప్పుచున్నాను వినుము. దుష్టత్వమను పొలమునుదున్ని దుర్మార్గమను పైరువేసిన వారు, కడన పాపపు పంటనే కోసికొందురు.
9. దేవుని శ్వాసము వారిని నాశనము చేయును. అతని ఉగ్రశ్వాసమువలన వారు బుగ్గియగుదురు
10. వారు సింహమువలె గర్జించి ఆర్భటింతురు. కాని దేవుడు వారి కోరలను విరుగగొట్టును.
11. వారు తిండి దొరకని సింగమువలె చత్తురు. వారు సింహము పిల్లలువలె చెల్లాచెదరగును.
12. నాకొక సందేశము విన్పించినది. నా చెవులొక మెల్లని స్వరమును ఆలకించినవి.
13. నరునికి కలలు వచ్చువేళ, గాఢముగా నిద్రపట్టువేళ ఈ సంఘటన జరిగినది.
14. అపుడు నేను మిగుల భయపడి గడగడ వణకితిని నా దేహమంత భీతితో కంపించిపోయినది.
15. నా మొగము మీదుగా మెల్లనిగాలి వీచినది. వెంటనే నా శరీరము గగుర్పొడిచినది.
16. నా ఎదుట ఎవ్వరో నిల్చియున్నట్లు కన్పించినది. నేను ఆయన రూపురేఖలను కాంచజాలనైతిని. ఆయన మాత్రము నా ఎదుట నిల్చియున్నట్లు చూపట్టెను. కొంతతడవు నిశ్శబ్దము అంతట నేనొక స్వరము వింటిని:
17. "ఏ నరుడైనను దేవుని యెదుట నీతిమంతునిగా కన్పింపగలడా? ఎవడైనను సృష్టికర్త ముందట పవిత్రుడుగా చూపట్టగలడా?
18. దేవుడు స్వరములోని తన సేవకులనే నమ్మడు. ఆయన దేవదూతల గణములోనే తప్పుపట్టును
19. అట్టివాడు మట్టి ఇండ్లలో జీవించే మర్త్యుని, దుమ్ముతో తయారైన నరుని, చిమ్మటవలె చితికిపోవు మానవుని నమ్మునా?
20. నరుడు ఉదయముండి, సాయంకాలమునకు గతించును. ఇక శాశ్వతముగా కనుమరుగైపోవును. ఆ మీదట అతనిని ఎవ్వరును జ్ఞప్తియందు ఉంచుకొనరు.
21. వారి ఘనత కొట్టివేయబడగా వారు జ్ఞానహీనులై నశించుదురు."
1. నీ వేడుకోలును ఆలకించువారు ఎవరైన ఉన్నచో మొర పెట్టుకొనుము. ఏ దేవదూతయైన నీ గోడును ఆలకించునేమో చూడుము.
2. కోపము వలన బుద్దిహీనుడు నశించును. అసూయ వలన తెలివితక్కువవాడు చెడును.
3. బుద్దిహీనులు మొదట సురక్షితముగా ఉన్నట్లే కన్పించిరి. అంతలోనే నేను వారి ఇండ్లను శపింతును.
4. ఒక్క దెబ్బతో వారి తనయులు నిరాశ్రయులైరి. ఇక వారికి ఆదరువు చేకూర్చువారు ఎవరునులేరైరి
5. ఆ మందమతుల పంట ఆకలిగొనినవారి పాలయ్యెను దేవుడు వారిని ఆ పంటను అనుభవింపనీయడయ్యెను. దప్పికగొనినవారు వారి సంపదను ఆశించిరి.
6. వ్యధలు మట్టిలో నుండి పుట్టుకరావు. తిప్పలు నేలలోనుండి మొలకెత్తవు.
7. నిప్పురవ్వ ఆకాశమునకు ఎగిసినంత సులువుగా నరుడు తన తిప్పలను తానే కొనితెచ్చుకొనును.
8. నాకు నేను దేవుని వెదకి, నా గోడును అతడికి విన్పించుకొందును.
9. ఆయన మనము గ్రహింపలేని మహాకార్యములు చేయును. ఆయన అద్భుతకార్యములకు అంతమే లేదు.
10. ఆయన భూమిమీద వానలు కురియించును. పొలముల మీద నీళ్ళు కుమ్మరించును.
11. దీనులను ఆసనముల మీదికి ఎక్కించును. దుఃఖితులకు ఆనందమును ఒసగును.
12. మోసగాండ్ర పన్నాగములు వమ్ముచేయును. వారి కుతంత్రములను రూపుమాపును.
13. లౌకికులు వారి వలలలో వారే చిక్కుకొనునట్లు చేయును. వంచకుల కార్యములు విఫలమగునట్లు చేయును
14. వారికి మధ్యాహ్నముకూడ రాత్రివలె చూపట్టును వారు పట్టపగలుకూడ , దారి తెలియక తడుములాడుదురు.
15. ఆయన పేదలను మృత్యువు బారినుండి కాపాడును. దరిద్రులను పరపీడనమునుండి రక్షించును.
16. దీనుల ఆశలను చిగురింపజేయును. దుర్మార్గుల నోళ్ళు మూయించును.
17. దేవుడు శిక్షించి చక్కదిద్దిన నరుడు ధన్యుడు. కనుక నీవు ప్రభువు శిక్షకు కోపింపవలదు.
18. దేవుడు గాయపరచువాడు, కట్టుగట్టువాడుకూడ దెబ్బలు కొట్టువాడు, చికిత్స చేయువాడుకూడ.
19. ఆయన ఆరున్నొక్క కష్టములలో నిన్ను కాపాడును. కనుక పదిన్నొక్క కష్టములలో నీ కెట్టి కీడు వాటిల్లదు.
20. కరువుకాలములో ఆయన నిన్ను చావునుండి కాపాడును. యుద్ధకాలములో ఖడ్గమునుండి తప్పించును.
21. ఆయన కొండెములు చెప్పువానినుండి నిన్ను రక్షించును. దుర్మార్గుల దుండగములనుండి నిన్ను బ్రోచును,
22. దౌర్జన్యము, ఆకలియు నిన్ను బాధింపజాలవు. వన్యమృగములు నిన్ను భయపెట్టజాలవు.
23. నీవు పొలములోని రాళ్ళతో సఖ్యముగా ఉందువు క్రూరమృగములు నీతో చెలిమిచేయును.
24. నీ గుడారము క్షేమముగా ఉన్నదని తెలుసుకొందువు నీ మందను పర్యవేక్షించి ఏదీకూడా పోగొట్టుకోలేదని తెలుసుకొందువు.
25. నీ సంతానము తామరతంపరగా వృద్ధి చెందును నీ బిడ్డలు పొలములోని పచ్చికవలె వర్దిల్లుదురు
26. పంటకారువరకు పండి నిలిచిన గోధుమ పైరువలె నీవు పండువంటి నిండు జీవితము గడపుదువు.
27. అయ్యా! మేమీ సంగతులనెల్ల పరిశీలించి తెలిసికొంటిమి. ఇవి సత్యములు గావున నీవు వీనిని గ్రహించుట మంచిది."
1. తరువాత యోబు మాటలాడుచు ఇట్లనెను:
2. “నా బాధలను తూచగలమేని, నా వ్యధలను తక్కెడలో పెట్టి తూయగలుగుదుమేని,
3. అవి సముద్రపు ఇసుక దిబ్బలకంటె ఎక్కువ బరువుగా ఉండును. కనుకనే నేను దుడుకుగా మాట్లాడితిని.
4. ప్రభువు అంబులు నా దేహములో గ్రుచ్చుకొనినవి. నా హృదయమువాని విషముతో నిండిపోయినది ప్రభువు పంపు యాతనలు నా మీదికి బారులుతీరి వచ్చుచున్నవి.
5. పచ్చిక దొరకిన గాడిద ఓండ్రపెట్టునా? ఎండుగడ్డి దొరకిన ఎద్దు రంకెవేయునా?
6. ఉప్పులేని చప్పిడి భోజనము ఎవరికి రుచించును? కోడిగుడ్డులోని తెలుపులో రుచిగలదా?
7. నేను ముట్టుకొనని వస్తువులు నాకు హేయములు అయినను, అవియే నాకు భోజనపదార్ధములు అయినవి.
8. ప్రభువు నా మొర ఆలకించి నా వేడుకోలును అనుగ్రహించును గాక!
9. ప్రభువు తన చిత్తమువచ్చినట్లు నన్ను ఛిద్రము చేయునుగాక! అతడు నన్ను నాశనము చేసిన ఎంత మేలగును!
10. అట్లయిన నేనెంతయో సంతసించియుందును. నా బాధ ఎంత గొప్పదయినను ఉపశాంతి పొంది ఉందును. నేను పవిత్రుడైన ప్రభువు శాసనములను మీరలేదు
11. నా బలము ఏపాటిది? నేను కనిపెట్టుకొనుట ఏల? నా అంతము ఏపాటిది? నేను తట్టుకొనుట ఏల?
12. నేనేమి శిలనా? నాది ఇత్తడి దేహమా ఏమి?
13. ఇక నాలో ఏమి శక్తి మిగిలియున్నది! ఇక నాకేమి దిక్కు కలదు?
14. నిరాశవలన దేవుని నమ్మలేనివారికి స్నేహితుల అండదండలు ఎంతయో ఆవశ్యకముకదా?
15. నా సోదరమిత్రులు ఎండినవాగువలె, పారీపారని జలప్రవాహములవలె నమ్మకూడని వారైరి.
16. అట్టి ప్రవాహములు కరిగిపోయిన మంచుగడ్డలతో హిమముతో అంచులవరకు పొంగిపారును.
17. కాని బెట్టవేడిమివలన ఆ యేరులు ఎండిపోవును వానిలోని నీరెల్ల యింకిపోవును.
18. బిడారులు ఎడారిలో ఆయేరులకొరకు గాలింతురు వాని కొరకు చాలదూరమువరకు పోయి నాశనమగుదురు.
19. తేమా, షేబా బిడారులు ఆ యేరుల కొరకు ఆశతో గాలింతురు.
20. కాని ఆ ఎండిపోయిన యేరులను చేరుకొనగానే వారి ఆశలెల్ల నిరాశలగును.
21. మీరును నాపట్ల ఆ యేరులవంటివారలు అయితిరి మీరు నన్ను గాంచి భయముతో వెనుదీయుచున్నారు.
22. 'నేను మిమ్ము ఏమైనా ఈయుడు' అని అడిగితినా? నా నిమిత్తము 'మీ కలిమినుండి లంచమును ఈయుడు' అంటినా?
23. శత్రువు బారినుండి నన్ను రక్షింపుడని అంటినా? హింసకుని బానిసత్వమునుండి నన్ను విడిపింపుమంటినా?
24. మీరు నాకు బోధచేయుడు, నేను మౌనముగా విందును. నా దోషము ఎట్టిదో మీరే నిరూపింపుడు.
25. యథార్థము చెప్పిన సహింపవచ్చును. కాని మీ వాదముతో మీరు నన్ను ఇట్లు నిందింపనేల?
26. నిరుత్సాహముతోనున్న నా మాటలు పొల్లువలె ఎగిరిపోవు తేలికమాటలు కనుక వానిని చులకన చేయవచ్చునని మీ భావమా?
27. మీరు అనాధ శిశువులను బానిసలుగా కొన చీట్లువేసెదరు. మీ మిత్రులవలన లాభము బడయజూతురు.
28. మీరు నా మొగములోనికి చూచి మాటలాడుడు. నేను కల్లలాడువాడను కాను.
29. ఆగుడు! న్యాయముగా నన్ను విచారింపుడు నాయెడ తప్పిదములేదు. కనుక నేను దోషినని తీర్పుచెప్పకుడు.
30. నేను అబద్దములాడితినని మీరు అనుకొంటిరా? మంచిచెడ్డలకుగల వ్యత్యాసము నాకు తెలియదనుకొంటిరా?
1. మానవజీవితము యుద్ధమున నిర్బంధపోరాటము వంటిదికాదా? కూలివాడు కూలికి పనిచేయుట వంటిదికాదా?
2. బానిస నీడకొరకు తపించుచు శ్రమచేయుట వంటిది. పనివాడు జీతముకొరకు కాయకష్టము చేయుట వంటిది.
3. ఎట్టి ఆశయు లేకయే నేను నెలలు గడపితిని. విచారముతో రాత్రులు వెళ్ళబుచ్చితిని.
4. నేను పరుండినపుడు 'పగలెప్పుడు వచ్చునా' అనుకొందును. తిరిగి 'ఎప్పుడు లేచెదనా' అనుకొందును. వేకువదాక నిద్దురపట్టక బాధపడుదును.
5. నా ఒడలి నిండ పుండ్లు లేచి పురుగులు పడినవి. నా చర్మము పగిలి రసికారుచున్నది.
6. నా రోజులు నేతగాని నాడెకంటె వేగముగా పరుగిడుచున్నవి. అవి నాకెట్టి ఆశ మిగుల్పకుండనే వెడలిపోవుచున్నవి.
7. ప్రభూ! నా జీవితము శ్వాసవలె క్షణికమైనది. నా కన్ను ఇక మేలును చూడదు.
8. పూర్వము నన్నెరిగినవారికి నేనిక కన్పింపబోను. నీవు నన్ను చూచుచుండగనే మరుగైపోయెదను.
9. మబ్బు కరిగి మాయమైపోవును. అట్లే పాతాళమునకు పోవువాడు మరల పైకి రాజాలడు.
10. అతడు తన ఇంటికి తిరిగిరాడు. ఇక అతడినెవరు జ్ఞప్తియందుంచుకొనరు.
11. ఇట్టి పరిస్థితులలో నేను మౌనముగా ఉండజాలను నా బాధలలో నేను మాటలాడక తప్పదు. నా మనోవేదనలో నేను మొరపెట్టెదను.
12. ప్రభూ! నన్ను నిరంతరము నీ అదుపులో ఉంచుకొనుటకు నేనేమి సముద్రమును అనుకొంటివా లేక సముద్రములోని మహాసర్పమనుకొంటివా?
13. 'నేను పడకపై పరుండి విశ్రాంతి పొందగోరెదను. నా బాధలనుండి ఉపశాంతి చెందగోరెదను'.
14. కాని నీ స్వప్నములతో నీవు నన్ను భయపెట్టుచున్నావు. నీ దర్శనములతో నన్ను కలవరపెట్టుచున్నావు.
15. ఈ వేదనలు అనుభవించుటకంటె నేను చచ్చుట మేలు. ఎముకల గూడునైన నేను మరణమును ఆశించుచున్నాను.
16. నాకు నిరాశకలిగినది, ఇక జీవించి లాభములేదు నీవిక నా జోలికి రాకుము, నా జీవితము నిరర్ధకమైనది.
17. నీవు ఇంతగా పట్టించుకొనుటకు, ఇంతగా పరిశీలించి చూచుటకు, నరుడు ఏ పాటివాడు? అతని బండారమెంత?
18. నీవు ప్రతిదినము అతనిని పరీక్షించి చూడవలయునా? ప్రతిక్షణము అతనిని పరిశీలించి చూడవలయునా?
19. నీ నేత్రములను నానుండి ప్రక్కకు త్రిప్పవా? కనీసము గుటక వేయునంత కాలమైన నన్ను విడిచిపెట్టవా?
20. నీవేమో అహోరాత్రులు నరులను గమనించుచున్నావుగాని, నేను తప్పుచేసినను నా పాపము నిన్నెట్లు బాధించినదో చెప్పుము. నీవు నన్ను నీ కోపమునకు గురిచేయవలయునా? నేను నీకు అంత భారమైతినా?
21. నీవు నా పాపమును సహింపలేవా? నా దోషమును మన్నింపలేవా? నేను శీఘ్రమే మట్టిలో కలిసిపోయెదను. నీవు నన్ను వెదకుదువుగాని నేను నీ కంటబడను”
1. అటుతరువాత షూహా నగరవాసి బిల్థదు మాటలాడుచు ఇట్లనెను:
2. "అయ్యా! నీ మాటలకు అంతములేదా? నీ నోటి పలుకులు సుడిగాలివలె ఉన్నవి.
3. దేవుడు న్యాయమును చెరచునా? ఆయన ధర్మమును మంటగలుపునా?
4. నీ కుమారులు దేవునికి ద్రోహము చేసియుందురేని ఆయన వారిని తగిన రీతిగనే శిక్షించెను.
5-6. నీవిపుడు దేవునికి మొర పెట్టుకొనుము. నీవు నిజముగా భక్తుడవేని ప్రభువు నీకు తప్పక తోడ్పడును. నీ కుటుంబమును కాపాడును.
7. నీవు కోల్పోయిన దానికంటె అదనముగనే సిరిసంపదలు ఆయన దయచేయును.
8. నీవు పూర్వయుగముల వారిని ప్రశ్నించి చూడుము. మన పూర్వుల విజ్ఞానమును పరిశీలించి చూడుము
9. నిన్న మొన్నటి వారలమైన మనకేమి తెలియును? మన జీవితము నీడవలె సాగిపోవునది.
10. కాని ఆ పూర్వులను అడిగినచో వారు నీకు బోధచేయుదురు. వారు నీతో చెప్పు సంగతులివి.
11. జమ్ము బురదలోతప్ప వేరు తావున పెరుగునా? నీరులేని తావున తుంగలు ఎదుగునా?
12. నీరెండిపోగానే ఆ గడ్డిమొక్కలు వాడిపోవును. ఇతర గడ్డిమొక్కలకంటె వేగముగనే మాడిపోవును
13. దేవుని విస్మరించువాడును ఇట్లేయగును. ఆయనను నమ్మనివాడు సర్వనాశనమగును.
14. వాని నమ్మకము నూలుపోగువలె సన్నమైనది, సాలీడు గూడువలె పేలవమైనది.
15. అతడు తన ఇంటికి ఆనుకొనినచో అది నిలువదు. దానిమీదికి ఒరిగినచో అది కూలిపోవును.
16. అతడు సూర్యకిరణములకు చెట్టువలె ఎదిగి తోట అంతట కొమ్మలు చాచును.
17. ఆ చెట్టు వ్రేళ్ళు రాళ్ళలోనికి ప్రాకి శిలలను పెనవేసికొనును.
18. కాని ఆ చెట్టును అచటినుండి పెరికివేసినచో దాని పూర్వస్థానము ఎవరికిని గుర్తుండదు.
19. ఇదే అతని సంతోషకర జీవనవిధానము ఆ భూమినుండి వేరొకరు వచ్చెదరు.
20. ప్రభువు సన్మార్గులను చేయివిడువడు. దుర్మార్గులను ఆదరింపడు.
21. ప్రభువు నీవు మరల సంతసముతో నవ్వునట్లు చేయును. నీవు ఆనందముతో ప్రేలునట్లు చేయును.
22. కాని అతడు నీ శత్రువులను అవమానమున ముంచును. వారి నివాసములను సర్వనాశనము చేయును.”
1. అటుతరువాత యోబు మాట్లాడుచు ఇట్లనెను:
2. “నీవు చెప్పినది నిజమే. నరుడు దేవునితో వాదించి నెగ్గగలడా?
3. ఎవరైన దేవునితో వాదమునకు దిగినయెడల ఆయన వేయి ప్రశ్నలడుగును వానిలో ఒక్కదానికి మనము జవాబు చెప్పలేము.
4. ఆయన విజ్ఞాననిధి, శక్తి సంపన్నుడు, ఆయనను ఎవరు ఎదిరింపగలరు?
5. అతడు కొండలకు చెప్పకుండనే వానిని కదలించును. కోపముతో వానిని క్రింద పడద్రోయును.
6. భూకంపములను పంపి నేలను కదలించును. భూమిని భరించు స్తంభములను గడగడ వణకించును.
7. ఆయన ఆజ్ఞాపించి సూర్యోదయమును నిరోధింపగలడు. చుక్కలను ప్రకాశింపనీయకుండ అడ్డుపడగలడు.
8. ఆయనే ఆకాశమును దుప్పటివలె విప్పును. అలలను అణగదొక్కి సముద్రమును అదుపులో పెట్టుకొనును.
9. ఆయన స్వాతి మృగశీర్షము కృత్తిక అనువాటిని, దక్షిణ నక్షత్రరాసులను చేసినవాడు. "
10. ఆయన లెక్కలకందని మహాకార్యములు చేయును గణింపశక్యముకాని అద్భుతకార్యములు సల్పును
11. ఆయన నా ప్రక్కగా వెడలిపోయిన, నేను ఆయనను గుర్తింపలేను. ఆయన గమనమును కనిపెట్టజాలను.
12. ఆయన తాను తీసికోదలచినది తీసికొనును. నీవు చేయుచున్నదేమిటి?' అని ఎవరును ఆయనను అడ్డగింపజాలరు.
13. ఆయన కోపమునకు తిరుగులేదు. ఆయన తన శత్రువులనెల్ల నేలబెట్టి కాలరాచును.
14. అట్టి ప్రభువుతో నేను వాదింపగలనా? ఆయనకు బదులు చెప్పుటకు నాకు మాటలు దొరకునా?
15. నేను నిర్దోషినైనను, నన్ను నేను సమర్ధించుకోగలనా? న్యాయాధిపతియైన దేవుని కరుణింపుమని వేడుటకన్న నేను చేయగలిగినది ఏమున్నది?
16. ఆయన నన్ను మాటలాడనిచ్చినను నా పలుకులు ఆలించునా?
17. ఆయన నాకు కష్టములను పంపి నిష్కారణముగా నన్ను బాధించుచున్నాడు.
18. గ్రుక్కకూడ త్రిప్పుకోనీయకుండ నన్ను కడగండ్లపాలు చేయుచున్నాడు.
19. దేవునిమీద నా బలమును చూపెద ననుకొన్నచో ఆయన మహాశక్తిమంతుడు. ఆయన మీద వ్యాజ్యెమాడెదనన్న ఆయన నెవరు పిలుచుకొనివత్తురు?
20. నేను నిర్దోషినైనను నా నోరు నన్ను ఖండించును. నాయందు తప్పులేకున్నను ఆయన వాక్కు నన్ను దోషినిచేయును.
21. నేనసలు నిర్దోషినేనా? నాకే తెలియరాకున్నది. ఈ జీవితము నాకు దుర్బరముగా నున్నది.
22. అంతయు ఒకటే కావున దోషిని, నిర్దోషినిగూడ ఆయన సమముగనే నాశనము చేయునని నేనంటిని,
23. నిర్దోషి తలవని తలంపుగా నాశనముకాగా దేవుడు నవ్వి ఊరకుండును.
24. ఆయన దేశమును క్రూరుడైన పాలకుని వశము కావించి అందలి న్యాయాధిపతుల ముఖములను కప్పివేయును. అతడు కాకున్న ఈ కార్యమును మరి ఎవరు చేయుదురు?
25. నా దినములు మహావేగముగా పరుగిడుచున్నవి. వానివల్ల ప్రయోజనమేమియు లేదు.
26. జమ్ముతో చేసిన నావవలె వేగముగా వెడలిపోవును పక్షి మీదికి దుముకు డేగవలె త్వరగా పరుగిడుచున్నవి.
27. 'నేను నా విచారమును మరచిపోయి నగుమోమును చూపెట్టాలనుకొన్నచో
28. నా బాధలన్ని తిరిగి వచ్చుచున్నవి. దేవుడు నన్ను దోషినిగా గణించుచున్నాడు.
29. నేను దోషినైనచో ఇక ఈ వ్యర్థప్రయాసలన్ని ఎందులకు?
30. నేను మంచుతో శుద్ధిచేసికొనినను, నా చేతులను సబ్బుతో తెల్లగా కడుగుకొనినను లాభములేదు.
31. దేవుడు నన్ను మురికిగుంటలో పడద్రోసెను. నా బట్టలు నన్ను చూచి సిగ్గుపడుచున్నవి.
32. ఆయన నావలె నరుడుకాడు గనుక నేను ఆయనతో వాదింపజాలను. ఆయనతో వ్యాజ్యెమాడజాలను.
33. ఆయనకూ నాకు రాజీ కుదుర్చు మధ్యవర్తి ఎవడును లేడు కనుక
34. ఆయన తన దండమును నానుండి తీసివేయవలయును. నేను భయపడకుండ ఆయనమహాత్మ్యములు నాకు అగుపించవలెను.
35. అయినను నేను వెరవక మాటలాడెదను. ఏలయనగా నేను అట్టివాడను కానని అనుకొనుచున్నాను.
1.నాకు జీవితము మీద విసుగు పుట్టినది. మిత్రమా! నీవు నా మొరలాలింపుము. నేను నా ఆవేదన కొలది మాటలాడెదను. నేను దేవునితో ఇట్లు పలుకుదును:
2. "ప్రభూ! నీవు నన్ను దోషిగా నిర్ణయింపవలదు. అసలు నా అపరాధమేమిటో తెలియజెప్పుము.
3. నీవు స్వయముగా కలిగించిన నన్ను అనాదరముచేసి ఇప్పుడు ఈ రీతిగా బాధించుట న్యాయమా? నీవు దుర్మార్గుల పన్నాగములను అనుమతింతువా?
4. నీ కన్నులు మా కన్నుల వంటివేనా? నీవు నరులు చూచిన చూపున చూతువా?
5. నీ జీవితము నరుల జీవితమువలె హ్రస్వకాలికమైనదా? నీ రోజులు నరుల రోజులవలె సాగిపోవునవా?
6. కానిచో నీవు నా దోషములను విచారింపనేల? నా అపరాధములను గాలింపనేల?
7. నేను నిర్దోషినని, నీ చేతినుండి నన్నెవరు విడిపింపలేరని నీవెరుగుదువు.
8. నీవే నన్ను సృజించి నాకు ఈ రూపము నిచ్చితివి కాని నీవే నన్నిపుడు నాశనము చేయబూనితివి.
9. నీవు నన్ను మట్టినుండి మలిచితివి. తిరిగి నన్ను మట్టిపాలు కావింతువా? "
10. పాలనుండి వెన్న ఏర్పడినట్లుగా నీవు నన్ను మాతృగర్భమున రూపొందించితివి.
11. నీవు నాకు వస్త్రమువలె చర్మము తొడిగితివి. ఎముకలతో, నరములతో నన్ను బట్టవలె నేసితివి
12. అటుపిమ్మట నాకు ఊపిరి పోసి ప్రేమతో నన్ను పరామర్శించితివి.
13. కాని ఇంత చేసియు నీవు మోసముతో వర్తించి, నాకు హానిచేయుటకు సమయము కొరకై వేచియుంటివని ఇప్పుడు నేను గుర్తించితిని.
14. నేను పాపము చేసినచో, ఆ నాకు క్షమాభిక్ష నిరాకరింపవచ్చునని, నీవు కనిపెట్టుకొనియుంటివి.
15. కనుక నేను తప్పుచేసినచో సర్వనాశనమయ్యెదను నేను నీతిమంతుడనైనను తలెత్తుకోలేకున్నాను. నేను బాధావమానములతో క్రుంగిపోవుచున్నాను
16. నేనొకవేళ తల ఎత్తుకొని తిరిగినా నీవు సింహమువలె నన్ను వేటాడి నీ విజయములను హెచ్చించుకొందువు
17. నీవు నామీదకు మరలమరల దాడిచేసి నన్ను దెబ్బమీద దెబ్బకొట్టుదువు
18. నీవసలు నన్ను మాతృగర్భమునుండి వెలికితీయనేల? నేనపుడే చనిపోయినచో నన్నెవరు చూచియుండెడివారుకారు.
19. నేను మాతృగర్భమునుండే నేరుగా సమాధి కేగినచో, అసలు జన్మింపకనే ఉండెడివాడనుకదా?
20. నా రోజులు ముగియనే ముగిసినవి. నీ చూపునిక నా నుండి మరల్పుము. ఈ మిగిలిన స్వల్పకాలమైన, నేను కొంచెము ఊరడిల్లెదను.
21. నేనిక నరులు తిరిగిరాని చోటికి వెళ్ళిపోయెదను. అంధకార విషాదములు అలముకొనిన తావును చేరుకొందును.
22. అచట కటికచీకటి, నీడలు గందరగోళము ఉండును వెలుతురు కూడ గాఢ తమస్సువలె ఉండును.”
1. అటు పిమ్మట నామా దేశీయుడు సోఫరు ఇట్లనెను:
2. "అయ్యా! నీ పలుకులకు జవాబులేదనుకొంటివా? అతిగావాగివాని వాదమే ఒప్పుకానక్కరలేదు కదా?
3. నీ ప్రలాపములు ఆలించి ఊరకుండుటకు మేమేమి మూగవారలమా? నీ అపహాసవాక్యములను మేము ఖండింప లేమనుకొంటివా?
4. 'నా పలుకులు సత్యములని దేవుని దృష్టిలో నేను పవిత్రుడననియు' అని నీవు వాదించుచున్నావు.
5. కాని దేవుడు నోరు విప్పి నీకు బదులు చెప్పినచో విజ్ఞాన మర్మములు నీకు తెలియజేసినచో,నీ తెలివితేటలు ఎందుకు కొరగాకుండబోవును
6. నీ తప్పిదములకుగాను అతడు నిన్ను లెక్క అడుగునని నీవు గ్రహింతువు.
7. అసలు నీవు దేవుని మర్మమును గ్రహింపగలవా? ఆయన మహాత్మ్యమును తెలిసికోగలవా?
8. అది ఆకాశముకంటె ఉన్నతమైనది. నీవు దానినెట్లు గ్రహింతువు? పాతాళముకంటె గంభీరమైనది. నీవు దానినెట్లు గుర్తింతువు?
9. అది పుడమికంటెను నిడువైనది. సాగరముకంటెను విశాలమైనది.
10. దేవుడు నిన్ను తీర్పుకు రమ్మని పిల్చినచో ఆయనను ఎవరు వారింపగలరు?
11. దేవుడు నరుని కోరగాని తనమును ఎరుగును. మనుషుని దోషములను బాగుగా గుర్తించును.
12. అయితే అడవి గాడిదపిల్ల నరుడై, పుట్టవచ్చునేమోగాని, బుద్దీహీనుడు వివేకికాడు.
13. ఓయి! నీవు నీ హృదయమును సరిదిద్దుకొని ఆ ప్రభువు ముందు చేతులు జోడింపుము.
14. నీ దోషమును విడనాడుము. అధర్మమును నీ ఇంటినుండి వెడలింపుము.
15. అప్పుడు నీవెట్టి భయమునకు గురికాక, లోకమందు తలయెత్తుకొని తిరుగుదువు.
16. అప్పుడు దాటిపోయిన వరదలవలె నీ వ్యధలను విస్మరింపగలుగుదువు.
17. నీ జీవితము మిట్టమధ్యాహ్నపు సూర్యతేజమువలె ప్రకాశించును. తమస్సులు విచ్చిపోయి, ఉషోదయము ప్రాప్తించును
18. నీవు నమ్మకముతో భద్రముగా బ్రతుకుదువు. ప్రభువు నిన్ను సురక్షితముగా కాపాడును.
19. ఇక శత్రువు లెవరు నిన్ను భయపెట్టజాలరు. ఎల్లరు నీ మన్ననల నాశింతురు.
20. కాని దుర్మార్గులు మాత్రము నలువైపులు పరికించి తప్పించుకొనుమార్గము లేదని గ్రహించి చావుకు సంసిద్ధులగుదురు.”
1-2. తరువాత యోబు ఇట్లనెను; “ఓయి! లోకములోని నరుల భావములే నీనోట వచ్చుచున్నవి అసలు విజ్ఞానము నీతోనే అంతరించునేమోనని అన్పించుచున్నది
3. నాకుకూడ నీపాటి తెలివితేటలున్నవి. నేను నీకంటె తక్కువవాడను కాను. నీవు చెప్పిన సంగతులెల్లరికిని తెలిసినవే.
4. నా స్నేహితులిపుడు నన్ను చూచి నవ్వుచున్నారు. నేను నిర్దోషినైనప్పటికీ నవ్వులపాలయితిని. అంకాని పూర్వము దేవుడు నా మొర ఆలకించెను.
5. నీకు చీకుచింతలేదు కనుక నన్ను గేలిచేయుచున్నావు. కాలుజారు వారి కొరకు తిరస్కారము కనిపెట్టుచున్నది.
6. కాని లోకములో దోపిడిమూకలు హాయిగా బ్రతుకుచున్నవి. దేవుని లక్ష్యపెట్టనివారు సురక్షితముగా జీవించుచున్నారు. వారెల్లరు తమ స్వీయశక్తియే తమకు దేవుడనుకొందురు.
7. నీవింకను తెలిసికోగోరెదవేని మృగములను అడుగుము. పక్షుల నడుగుము అవియెల్ల నీకు నేర్పును.
8. నేలనడిగిన నీకు బోధచేయును. సముద్రమునందలి చేపలు నీకు పాఠము చెప్పును
9. ప్రభువే తమను చేసెనని ప్రాణులకెల్ల తెలియును
10. జీవించు ప్రతి ప్రాణి ప్రాణము, ప్రతి నరుని ఊపిరి, ఆయన ఆధీనములో ఉన్నది.
11. జిహ్వ భోజనపు రుచివలన సంతసించినట్లే శ్రవణము వినికిడివలన సంతుష్టిచెందును.
12. వృద్ధులు విజ్ఞానమును ఆర్జింతురు. పెద్ద ప్రాయమువలన వివేకము పుట్టును.
13. కాని దేవునియందు విజ్ఞానమును,శౌర్యమును కలదు ఆయన వివేకవంతుడు క్రియాపరుడుకూడ.
14. ఆయన కూలద్రోసిన ఇంటినెవ్వరు తిరిగి కట్టజాలరు. ఆయన చెరగొనిన నరునెవ్వరు విడిపింపజాలరు
15. ఆయన వానలను ఆపివేయగా అనావృష్టి కలుగుచున్నది. జలములను వదలివేయగా వరదలు వచ్చి నేలను పాడుచేయును.
16. ఆయన బలాఢ్యుడు విజేతకూడ, మోసగాడు, మోసమునకు గురియైనవాడుకూడ ఆయనకు లొంగుదురు.
17. ఆయన సలహాదారుల తెలివిని వమ్ముచేయును. న్యాయాధిపతులను మూర్ఖులను చేయును.
18. రాజులను కూలద్రోసి బందీలను చేయును.
19. యాజకులకు తలవంపులు తెచ్చును. ఆ బలాడ్యులను లొంగదీసికొనును.
20. మాటకారులను మూగలను చేయును. వృద్ధులు వివేకమును కోల్పోవునట్లు చేయును.
21. అభిజాత్యము కలవారిని మన్ను గరపించును. రాజుల బలము గాలికి పోవునట్లు చేయును.
22. అగాధములలోని తమస్సులను తొలగించును. జ్యోతిని గాఢాంధకారముతో కప్పివేయును.
23. జాతులను వృద్ధిలోనికి తెచ్చి మరల జారవిడుచును ప్రజలకు పెంపుదయచేసి తిరుగచేయి విడుచును
24. దేశనాయకులకు బుద్ధిమాంద్యము కలిగించి, వారు దారులులేని ఎడారులలో తిరుగాడునట్లు
25. వెలుతురులేని చీకటితావులలో కొట్టుమిట్టాడునట్లు తప్పత్రాగినవారివలె తూలిపడిపోవునట్లు చేయును
1. ఈ సంగతులెల్ల నేను కన్నులార చూచియు చెవులార వినియు తెలిసికొంటిని.
2. మీరెరిగిన అంశములు నేను ఎరుగుదును. నేను మీ కంటే తక్కువవాడనేమి కాదు.
3. కాని నేను మీతోగాక దేవునితో మాట్లాడగోరెదను. నేను వాదింపగోరినది ప్రభువుతోనే.
4. మీరు అబద్దాలతో మీ వాదనలను సమర్థించుకొనుచున్నారు. వ్యాధులను కుదర్పలేని వైద్యుల వంటివారు మీరు.
5. మీరిక నోరు మూసికొనినచో బాగుగానుండును. మౌనమే మీకు విజ్ఞతయగునుగాక!
6. మీరిక నా వాదమును వినుడు. నా పెదవుల మనవుల నాలకింపుడు.
7. మీరు మీ మిథ్యావచనములతో దేవుని తరపున వాదింపనక్కరలేదు.
8. పక్షపాత బుద్ధికలవారు ఆయన క్షమున న్యాయవాదులుగా వ్యవహరింపగలరా?
9. ఆయన మీ లోగుట్టును తెలిసికోలేడా? నరులనువలె దేవుని వంచింపగలమా?
10. మీరు రహస్యముగా పక్షపాతము చూపించినచో ప్రభువు మిమ్ము తీవ్రముగా మందలించును.
11. ఆయన వైభవమును చూచి మీరు భయభ్రాంతులై భీతితో కంపించిపోవుదురు
12. మీ విజ్ఞానసూక్తులు బూడిదవలె విలువ లేనివి. మీ వాదములు మట్టివలె బలము చాలనివి.
13. మీరిక మౌనము వహించి నన్ను మాటాడనిండు. నాకు జరగబోవునది జరుగును గాక!
14. నేనెందుకు నా ప్రాణమును ఎరగా చేసుకొనవలెను ఈ పట్టున ప్రాణములు ఒడ్డుటకు నేను వెనుకాడనుగాని ప్రాణములకు తెగించి మాట్లాడుదును.
15. నేను ఆశలనెల్ల విడనాడితిని. దేవుడు నన్ను చంపిన చంపుగాక! ఆయన ముందు నేను నిర్దోషినని మాత్రము నిరూపించుకొందును.
16. దైవభక్తిలేని వాడెవడును దేవుని ఎదుటికి రాజాలడు కనుక నా ఈ సాహసము నన్ను రక్షించిన రక్షింపవచ్చును.
17. మీరు నా మాటలు ఆలకింపుడు. నా పలుకులు సావధానముగా వినుడు.
18. నేను నిరపరాధినన్న నమ్మకము నాకు ఉన్నది కనుక నా అభియోగమును విన్నవించుకొందును.
19. దేవుడు నా మీద నేరము మోపుటకు వచ్చిన రానిండు. మౌనముగా ప్రాణములు త్యజించుటకు నేను సంసిద్దుడనే.
20. ప్రభూ! నీవు నాకు రెండు వరములు దయచేయుము. నేను నీనుండి దాచి పెట్టునది ఏమియులేదు.
21. మొదట నీవు నన్ను బాధించుట మానుకొనుము. నీ భయమును నాయొద్దనుండి తొలగింపుము.
22. ఆ పిమ్మట నీవు నన్ను ప్రశ్నింపుము. నేను నీకు బదులు చెప్పెదను. లేదా నేనే నిన్ను ప్రశ్నింతును, నీవు నాకు బదులు చెప్పుము.
23. నేనేమి తప్పులు చేసితిని? ఏమి పాపములు కట్టుకొంటిని? ఏ అపరాధములు సల్పితిని? ఏ ఆజ్ఞలు మీరితిని?
24. నీవు ఇపుడు మొగము చాటుచేసికోనేల? నన్ను నీ శత్రువునిగా భావింపనేల?
25. గాలికెగిరిపోవు ఈయాకునా నీవు భయపెట్టునది? ఎండిపోయిన ఈ తాలునా నీవు వెంటాడునది?
26. నేను బాలుడిగా ఉన్నప్పుడు చేసిన పాపములకు నీవు నామీద ఘోరమైన నేరములుమోపుచున్నావు
27. నీవు నా పాదములను బండకొయ్యలో బిగించితివి. నేను పోవు మార్గములను, నా అడుగుజాడలను గుర్తుపట్టితివి.
28. నేను చివికిపోయిన కొయ్యవలెను, చిమ్మటలు కొట్టిన వస్త్రములవలెను తుత్తునియలు అయితిని. నా ప్రవర్తననంతయు నీవు గిరిగీసి కనిపెట్టుచున్నావు
1. నారికి జన్మించిన నరులు అల్పాయుష్కులు, బహువేదనలకు గురి అయ్యెడి వారలుకూడ.
2. వారు పూలవలె వికసించి అనతికాలముననే వాడిపోవుదురు. కదలిపోవు నీడవలె శీఘ్రమే కనుమరుగై పోవుదురు
3. ప్రభూ! ఇట్టి నరుడినా నీవు లక్ష్యము చేయునది? ఇట్టివానినా నీవు తీర్పునకు పిల్చునది?
4. అశుద్దుడైన నరునినుండి , శుద్ధగుణమునెవడు వెలికి తీయగలడు?
5. నరుడెంతకాలము జీవించునో నీవు ముందుగనే నిర్ణయించితివి. అతడు జీవించు నెలలను నిశ్చయించితివి. దాటరాని ఢిల్లలను అతనికి విధించితివి.
6. కనుక ఆ పేదనరుని ఇక వదలిపెట్టుము. వాని తిప్పలు వాడుపడును. బానిసవలె తన దినములు ఎలాగో ముగించుకొనును
7. నరికిన చెట్టు మరల చిగిర్చి తిరుగ కొమ్మలుసాచునను ఆశకలదు.
8. దాని వ్రేళ్ళు ఎండిపోయినను, మ్రోడు శిథిలమైపోయినను
9. నీరు తగులగనే అది మరల చిగురించి లేత మొక్కవలె కొమ్మలు వేయును.
10. కాని నరుడు చనిపోయిన పిమ్మట ఏమి మిగులును? మానవుడు మరణించిన పిమ్మట ఇక ఎక్కడనుండును?
11. నదులు ఎండిపోయినట్లు, సరస్సులు ఇంకిపోయినట్లు నరులు మట్టిలోగలిసి పోవుదురు వారు పండుకొని తిరిగిలేవరు.
12. పైన ఆకాశము ఉన్నంతకాలము వారు మరల లేవరు, దీర్ఘనిద్రనుండి మేల్కొనరు.
13. ప్రభూ! నీ కోపము చల్లారినవరకు నీవు నన్ను పాతాళమున దాచియుంచి, అటుపిమ్మట నన్ను జ్ఞప్తికి తెచ్చుకొనిన ఎంత బాగుండును?
14. చచ్చిన నరుడు మరల బ్రతుకునా? కాని నేను మంచిరోజులకొరకు వేచియుందును. నా కష్టములు తీరువరకు కాచుకొనియుందును
15. అప్పుడు నీవు నన్ను పిలువగా నేను నీకు బదులు పలుకుదును. నీవు స్వయముగా సృజించిన నన్ను నీవు మరల దర్శింపగోరుదువు.
16. ఇప్పుడు నీవు నా చర్యలను జాగ్రత్తగా గుర్తించుచున్నావు. కాని అప్పుడుమాత్రమునా పాపములను గణింపవు
17. నా అపరాధములను పూర్తిగా క్షమించి నా దోషములనెల్ల తుడిచివేయుదువు.
18. కానికాలము రాగా, కొండలు కూలిపోవును. శిఖరములు శిథిలములై పోవును.
19. జలప్రవాహములు కొండలను అరగదీయును, కుంభవర్షములు నేలను కోసివేయును. అట్లే నీవు నరుని జీవితాశను నాశనము చేయుదువు.
20. నీవు నరుని అణుగదొక్కి అతనిని శాశ్వతముగా నాశనము చేయుదువు. మనుజుని రూపుమాపి అతనిని నీ సమక్షము నుండి బహిష్కరింతువు.
21. ఆ మీదట అతని తనయులు పేరుప్రతిష్ఠలు తెచ్చుకొన్నను, అపకీర్తి తెచ్చుకొన్నను అతనికేమియు తెలియదు
22. అతడు తన దేహబాధనుమాత్రముస్మరించుకొనును తన ప్రాణమును గూర్చి మాత్రము తాను పరితపించును.”
1. అటు పిమ్మట తేమాను వాసి అయిన ఎలీఫసు ఇట్లనెను:
2. “విజ్ఞాని అయినవాడు ఇట్టి వాదము చేయుచు వ్యర్థపు మాటలు వినియోగించునా?
3. తెలివిగల వాడెవడైన నీవలె నిరర్థక పదజాలముతో తననుతాను సమర్ధించుకొనునా?
4. నీకు దైవభయము లేదు. దేవునికి మొరపెట్టుకోవలెనన్న కోరికయు లేదు.
5. నీవు దోషివి కనుకనే ఇట్టి పలుకులు పలికి కపటముతో నీ తప్పును కప్పిపెట్టుకోగోరుచున్నావు
6. నేను గాదు, నీ మాటలే నీవు దోషివని నిరూపించుచున్నవి.
7. నీ పలుకులే నీకు వ్యతిరేకముగా సాక్ష్యమిచ్చుచున్నవి నీవు లోకములో మొట్టమొదట జన్మించిన నరుడవా? లేక దేవుడు పర్వతాలను సృజింపకముందే పుట్టినవాడవా?
8. నీవు దేవుని ఆలోచనకర్తలలో ఒకడవా? విజ్ఞానమునకు నీవే కాణాచిననుకొంటివా?
9. నీకు తెలిసినంత మాకును తెలియును. నీవు గ్రహించినంత మేమును గ్రహింతుము.
10. తల నరసిన ముదివగ్గులనుండియే మేము జ్ఞానమును ఆర్జించితిమి. వారు మీ తండ్రికంటె వయోవృద్ధులు సుమా!
11. ప్రభువు నీకు ఉపశాంతి నొసగగా నీవు కాదందువా? మేము నీతో ఎంత మృదువుగా సంభాషింపలేదు?
12. కాని నీవు కోపముతో మండిపోవుచున్నావు, మిడిగ్రుడ్లతో మా వైపు తేరిచూచుచున్నావు,
13. నీవు దేవునిమీద ఆగ్రహము తెచ్చుకొని ఇట్టి వాదములు చేయుచున్నావు.
14. అసలు ఏ నరుడు నిష్కళంకుడో చెప్పుము? నారికి జన్మించిన నరులలో పుణ్యశీలుడు ఎవడు?
15. ప్రభువు దేవదూతలనే నమ్మడు. దూతగణములే అతని కంటికి నిర్దోషములుగా కన్పింపవు.
16. అట్లయినచో పాపమును నీటినివలె మ్రింగివేయు దబ్బరజాతికి చెందిన నికృష్టమానవుడా అతని దృష్టిలో నిర్మలుడు?
17. ఓయి! నీవు నా సందేశమును ఆలకింపుము. నేను నా అనుభవమును చెప్పెదను.
18. విజ్ఞులు వారి పితరుల బోధలు నాకెరిగించిరి. ఆ ఉపదేశములనే నేను నీకు విన్పించెదను.
19. వారికాలమున అన్యదేశీయులు మన నేలమీద వసింపలేదు. ఈ దేశమున వారు మాత్రమే వారసముగా నివసించిరి.
20. దుర్మార్గుడు నిరంతరము బాధలను అనుభవించును పరపీడకుడు జీవితాంతము వేదనలకు గురియగును.
21. అనవరతము భీకరధ్వనులు అతని చెవులలో మారుమ్రోగును. తాను సురక్షితముగా ఉన్నానని తలంచినపుడే దోపిడిగాండ్రువచ్చి అతనిమీద పడుదురు.
22. అతడిక చీకటినుండి తప్పించుకోజాలడు. తాను కత్తివాత బడుదునని గ్రహించును.
23. 'ఆహారమెక్కడ దొరకునా'యని అతడు దాని కొరకు తిరుగులాడును. అంధకార దినము సమీపించుచున్నదని వానికి తెలియును.
24. దురదృష్టములు, వేదనలు అతనిని భయపెట్టును వినాశము బలాఢ్యుడైన రాజువలె అతని మీదికెత్తి వచ్చును.
25. ఆ దుర్మార్గుడు ప్రభువు నెదిరించి ఆయనను సవాలు చేసెను.
26. దళసరి డాలు చేతబూని ప్రభువు మీదికి పోరాటమునకు వచ్చెను.
27. వాని ముఖము క్రొవ్వు పట్టి ఉన్నది. వాని నడుముచుట్టు క్రొవ్వు కండలు పెరిగి ఉన్నవి
28. అతడు నగరములను పట్టుకొని యజమానులు వీడిపోయిన గృహములను స్వాధీనము చేసికొనెను. కాని ఈ నగరములును, గృహములును నేలమట్టమగును.
29. అతని సంపదలు దీర్ఘకాలము నిలువవు. అతని ఆస్తిపాస్తులు మంట గలిసిపోవును. అతడి పొలము పంటతో బరువెక్కి నేలకు వంగదు.
30. అతడు చీకటిని తప్పించుకొనడు. అగ్నిజ్వాల అతని లేతకొమ్మలను దహించును. అతని చిగురులు గాలిచే రాలిపోవును.
31. అతడు స్వీయబలమును నమ్ముకొనెనేని ఆ నమ్మకము వ్యర్థమే అగును.
32. అతడు తన ఆయుస్సు తీరకముందే వాడిపోయిన కొమ్మవలె ఎండిపోవును. ఆ కొమ్మ మరల చిగురింపనేరదు.
33. అతడు పిందె రాలిపోయిన ద్రాక్షతీగవంటివాడును, పూత రాలిపోయిన ఓలివుచెట్టు వంటివాడును అగును.
34. దుర్మార్గుల సంతానము వృద్ధి చెందదు. లంచములతో కట్టిన ఇండ్లు మంటలలో కాలిపోవును
35. దుష్టులు దురాలోచనతో దుష్కార్యములు చేయుదురు వారి యెదలో కపటము గూడుకట్టుకొని ఉండును.”
1. తరువాత యోబు ఇట్లనెను:
2. "ఇట్టి మాటలు నేను మునుపే వినియుంటిని. నాకు మీ వలన ఓదార్పు గాక బాధయే కలుగుచున్నది
3. ఎంత కాలము మీరీ అర్ధములేని పలుకులు వల్లించెదరు. కడన మీ వాదమునే నెగ్గించుకోవలెననియా మీ కోరిక?
4. నేను కూడ మీ స్థానములో నున్నచో మీవలె మాటలాడి ఉందును. మీవలె తల ఆడించి ఉందును. దీర్ఘవాదములతో మిమ్ము తికమకలు పెట్టి ఉందును
5. ఉపశమనవాక్యములతో మీకు ఉపదేశము చేసియుందును.
6. కాని, నేను మాటలాడినచో నా బాధ తగ్గదు. మౌనముగా ఉన్నను ఉపశాంతి కలుగదు.
7. ఇపుడు నా స్నేహితుడు నన్ను విసిగించుచున్నాడు. అతడు, అతని తోడివారు నన్ను హింసించుచున్నారు
8. నా దేహమంతయు ముడతలు పడునట్లు చేసియున్నావు ఇది కూడా నా మీద సాక్ష్యముగానున్నది. నా క్షీణత ముఖాముఖిగా సాక్ష్యమిచ్చుచున్నది.
9. అతడు నా శరీరమును ముక్కలు ముక్కలుగా చీల్చివేసి, పండ్లు కొరకుచు నావైపు రౌద్రముగా చూచుచున్నాడు. నా శత్రువులు నాపై క్రూరచూపులను ప్రసరించుచున్నారు
10. వారెల్లరు ఏకమైనా చెంపలు వాయించుచున్నారు
11. ప్రభువు నన్ను దుర్మార్గుల వశముచేసెను. దుష్టుల చేతికి నన్ను చిక్కించెను.
12. నేను నిశ్చింతగా జీవించుచుండగా ప్రభువు నన్ను నేలకు విసిరికొట్టి ముక్కలుచేసెను. నా మెడపట్టి లాగి తన బాణములకు నన్ను గురిచేసెను.
13. ఆయన నలువైపులనుండి నా మీద అంబులు రువ్వి నిర్దయతో నన్ను తీవ్రముగా గాయపరచెను. నా పైత్యపు నీరు కారి నేలబడునట్లు చేసెను.
14. అతడు ప్రతిపక్ష యోధునివలె నామీద పడి నన్ను దెబ్బమీద దెబ్బకొట్టెను.
15. నేను దిగులుతో గోనె తాల్చితిని. ఓడిపోయి ఈ మంటిమీద బోరగిలబడితిని.
16. ఏడ్చి ఏడ్చి నా మొగము కందినది. నా కన్నులు వాచి నల్లబడినవి.
17. అయినను నేనేపాపము చేయలేదు. నా ప్రార్ధనలో చిత్తశుద్ధి లోపింపలేదు.
18. ఓ భూమీ! నా రక్తమును కప్పివేయకుము. న్యాయముకొరకు నేనుచేయు ఆక్రోశమును అణచివేయవలదు.
19. ఇకమీదట పరలోకమున నా పక్షమున ఒక సాక్షి నిలిచి ఉండి నన్ను సమర్థించి మాటలాడును.
20. నా కన్నులు అశ్రువులు కార్చుచుండగా నా ఆక్రోశమే న్యాయవాదియై దేవునియెదుట నన్ను సమర్ధించును,
21. నరుడు తన స్నేహితుని కొరకువలె నా కొరకు దేవునితో ఎవరైన మనవి చేసిన ఎంత బాగుండును!
22. నా కాలము సమీపించినది , నేను నరులు తిరిగిరాని చోటికి వెడలిపోనున్నాను
1. నా రోజులు ముగిసినవి, నా శ్వాసము మందగించినది. నాకు సమాధి సిద్ధముగా ఉన్నది.
2. ఎల్లరు నన్ను అపహాసము చేయుచున్నారు. వారికి నాపట్లగల అయిష్టమును, నేను గమనించితిని.
3. నాకు హామీగానుండువాడు ఎవడునులేడు కనుక ప్రభూ! నీవే నా పక్షమున హామీగా నిలువుము.
4. నీవు నా మిత్రుల బుద్ధిని మందగింపచేసితివి. వారు నన్ను అణగదొక్కకుండునట్లు చేయుము.
5. సొంతకుమారులు ఆకలితో అలమటించుచుండగా తండ్రి తన ఆస్తిని మిత్రులకు పంచియిచ్చినట్లయ్యెను.
6. ప్రజలెల్లరు నన్ను ఎగతాళి చేయుచున్నారు. నా మొగముమీద ఉమ్మి వేయుచున్నారు.
7. ఏడ్చియేడ్చి నా కన్నులకు చీకట్లు క్రమ్ముచున్నవి. నా శరీరావయవములన్ని చిక్కి శల్యమైపోయినవి
8. దైవభక్తులము అనుకొనువారు నన్ను చూచి విస్తుపోవుచున్నారు. నేను పాపినని నన్ను నిందించుచున్నారు
9. ధర్మాత్ములు అనుకొనువారు నన్ను గూర్చిన తమభావనలే నిజమని రూఢిగా నమ్ముచున్నారు.
10. కాని వారెల్లరు నా సమక్షమునకు వచ్చినచో వీరిలో సుజ్ఞాని ఒక్కడు లేడని రుజువగును.
11. నా జీవితము నేను తలవని రీతిగా సాగిపోయినది నా హృదయతంత్రులు తెగిపోయినవి. ఆశయములు అణగారినవి.
12. చీకటి వ్యాపింపగా , వెలుగు సమీపించెననుచున్నారు వెలుతురు చీకటిని పారద్రోలునని జనులు చెప్పుదురు.
13. కాని నేను మాత్రము మృతలోకము చేరుకోవలసినదే. అచటి పెనుచీకటిలో నిదురింపవలసినదే.
14. నా సమాధి 'నాకు తండ్రి' అని, నన్ను తినివేయు పురుగులు 'నాకు తల్లి, తోబుట్టువులు' అని నేను చెప్పుకొందును
15. ఇక నాకు ఆశ ఎక్కడిది? నాకు మంచి రోజులున్నవని ఎవరైన ఊహింతురా?
16. ధూళిలో నిదురింపగా అది పాతాళపు , అడ్డకమ్ములయొద్దకు దిగుచున్నది”.
1. తరువాత షూహా నివాసి బిల్డదు ఇట్లనెను:
2. “ఓయీ! ఈ మాటలిక చాలింపరాదా? నీవు మౌనముగానున్నచో మేము మాటలాడుదుము.
3. మేమేమి జ్ఞానములేని పశువులమనుకొంటివా? మాట్లాడలేని మూగ గొడ్డులమనుకొంటివా?
4. కోపముతో నిన్ను నీవు ముక్కలు ముక్కలుగా చీల్చుకొనినను నీ కొరకు ఈ ప్రపంచము నిర్మానుష్యము కాబోదు. దేవుడు నీ కొరకు కొండలను కదలింపబోడు.
5. దుష్టుని దీపము మాత్రము ఆరిపోవును. దానిని మరల ముట్టింప సాధ్యముకాదు.
6. అతని గుడారములోని దీపము మసకలు కమ్మును అతనికి వెలుగునిచ్చు వత్తి ఆరిపోవును.
7. అతడు బలము కూడగట్టుకొని అడుగులు వేసినను కూలి పడిపోవును. అతని కపటమే అతనికి వినాశము తెచ్చిపెట్టును.
8. అతడు నడిచి తనకుతానే ఉరులలో తగుల్కొనును. స్వయముగా వెళ్ళి వలలో చిక్కుకొనును.
9. అతని మడమ వలలో తగుల్కొనగా ఉచ్చు బిగుసుకొనిపోవును.
10. అతనిని పట్టుకొనుటకుగాను కంటికి కన్పింపని రీతిగా నేలమీద ఉచ్చు పన్నుదురు. అతని త్రోవలో బోనును అమర్తురు.
11. భయము అతనికి ఎల్లవైపుల పొంచి ఉండును. అది అడుగడుగున అతనిని వెన్నంటి వెళ్ళును.
12. అతడు ఆకలితో అలమటించును. వినాశనము అతని దరిదాపులలోనే కాచుకొని ఉండును.
13. అతని దేహము రోగముచే క్షీణించగా కాలుసేతులు పడిపోవును.
14. అతడు నమ్ముకొన్న తన ఇంట సురక్షితముగా వసించుచుండగా అచటినుండి ఈడ్చుకొనిపోయి క్రూరరాజైన మృత్యువు ఎదుట నిల్పుదురు.
15. అతని నింటిని గంథకముతో శుద్ధి చేసిన పిమ్మట దానిలో అన్యులెవరైన వసింతురు.
16. అతని క్రింది వ్రేళ్ళు ఎండిపోవును, పై కొమ్మలు వాడిపోవును.
17. భూమిమీద అతని పేరు మాసిపోవును. ఆ మీదట అతని నామమెవరును స్మరింపరు.
18. అతనిని వెలుగునుండి చీకటిలోనికి నెట్టివేయుదురు. జీవవంతుల లోకమునుండి గెంటివేయుదురు.
19. అతని సంతానము నిలువదు. అతని ఇంట అతని వారుసులెవరును వసింపజాలరు.
20. తూర్పు దేశీయులు, పశ్చిమ దేశీయులు గూడ అతడి దుర్గతినిగూర్చి విని భయముతో కంపింతురు
21. దేవుని లక్ష్యము చేయని దురాత్ములిట్టి అధోగతి పాలగుదురు.”
1. తరువాత యోబు ఇట్లనెను:
2. “ఎంతకాలము మీరు నన్నిట్లు హింసింతురు? మీ పలుకులతో నన్నెంత దనుక వేధింతురు?
3. తేపతేపకు మీరు నన్ను అవమానపరుచుచున్నారు నన్ను వేధించుచున్నామన్న ఇంకితజ్ఞానముకూడ మీకు లేదు.
4. ఒకవేళ నేను తప్పు చేసిన ఆ తప్పు నాదేకాని మీది కాదుగదా?
5. మీరు నాకంటె పుణ్యపురుషులము అనుకొనుచు, నా అపరాధముకుగాను నాకు ఈ గతి పట్టినదని ఎంచినచో
6. నన్ను అణగదొక్కినవాడు దేవుడేనని తెలిసికొనుడు నన్ను బంధించుటకు వలపన్నినవాడు ఆయనే.
7. నేను ఆయన దౌర్జన్యముగూర్చి మొరపెట్టినను, వినువాడు లేడు. న్యాయముకొరకు ఆక్రోశించినను ఆలించువాడు లేడు.
8. ఆయన నా త్రోవకు అడ్డము కల్పించెను. నా మార్గమును చీకటితో కప్పివేసెను.
9. నా పరువు మంటగలిపి, నా పేరు ప్రఖ్యాతులు నాశనము చేసెను.
10. నలువైపుల నుండి నన్నెదిరించి కూలద్రోసెను. నా ఆశను మొక్కనువలె పెరికివైచెను.
11. ఆయన కోపము నా మీద రగుల్కొనినది. ఆయన నన్ను తన శత్రువుగా భావించెను.
12. ఆయన సైన్యము నా మీదికి ఎత్తివచ్చి, నా నివాసమును ముట్టడించినది.
13. ఆయన నా సోదరులు నన్ను వీడిపోవునట్లు చేసెను. ఇరుగుపొరుగువారు నన్ను పరిత్యజించునట్లు చేసెను
14. నా బంధుమిత్రులు నన్ను విడనాడిరి.
15. నా అతిథులు నన్ను విస్మరించిరి. నా పనికత్తెలు నన్ను పరునివలెను, అన్యదేశీయునివలెను చూచుచున్నారు.
16. నా సేవకుని పిలిచినను పలుకుటలేదు. బతిమాలినను, నా మాట వినుటలేదు.
17. నా భార్య నా శ్వాసములోని దుర్గంధమును భరింపజాలకున్నది. నాసొంత సోదరులే నన్ను చీదరించుకొనుచున్నారు
18. నా పిల్లలే నన్ను అనాదరముతో చూచుచున్నారు. నేను కన్పించినపుడెల్ల కొంటెతనముతో నవ్వుచున్నారు.
19. నా ఆప్తమిత్రులు నన్ను అసహ్యించుకొనుచున్నారు నేను అనురాగముతో చూచినవారు నాకెదురు తిరుగుచున్నారు.
20. నా ఎముకలు నా చర్మమును, నా మాంసమును అంటియున్నవి. పంటిబిగువున నా ప్రాణము నిలిచి ఉన్నది.
21. ప్రభువు హస్తము నన్ను దారుణముగా శిక్షించినది. జాలిచూపుడు మిత్రులారా! మీరు నా మీద జాలి చూపుడు.
22. ప్రభువువలె మీరుకూడ నన్ను హింసింపవలయునా? ఇంతవరకు మీరు నన్ను వేధించినది చాలదా?
23-24. ఎవరైన నా ఈ పలుకులను గ్రంథమున వ్రాసి ఉంచినచో, లేదా వానిని ఉలితో రాతిపై చెక్కి పదిలపరచినచో, ఎంత బాగుండును?
25. అయినను, నా విమోచకుడు సజీవుడనియు, తరువాత ఆయన భూమిమీద నిలుచుననియు నేనెరుగుదును.
26. ఈ నా దేహము క్షీణించిపోయిన ఈ శరీరముతోనే నేను ప్రభువును దర్శింతును.
27. నా నేత్రములు స్వయముగా ఆయనను చూచును. నాలో నా అంతర్యింద్రములు కృశించినవి.
28. నాకు జరిగిన ఈ విషయములకు కారణము నాలోనే ఉన్నదనుకొని, మీరు ఆయనను ఎలా వెంటాడెదము? అని తలంచినయెడల
29. మీరు ఖడ్గమునకు భయపడుడు. దేవుని శాపము మీపై రగుల్కొనినది. మీకు తీర్పు తీర్చువాడొకడున్నాడని మీరు గుర్తింపుడు.”
1. తరువాత నామా దేశీయుడైన సోఫరు ఇట్లనెను:
2. “ఓయి! నేను నీకు సత్వరమే జవాబు చెప్పవలయును. నీకు బదులు చెప్పుటకునేను వేగిరపడుచున్నాను.
3. నీ వాదము నాకు ఎంతమాత్రమును నీకెట్లు ప్రత్యుత్తరమియ్యవలెనో నాకు తెలియును.
4. నరుడు భూమి మీద అవతరించిన ఆదిమకాలమునుండ ఈ సత్యము రుజువగుచున్నది ఇది నీకును తెలియును.
5. దుర్మార్గుడు స్వల్పకాలము మాత్రము సంతసించును. వాని సంబరము కొద్దికాలము మాత్రమే నిలుచును
6. దుష్టుడు ఆకాశమువరకు ఎదిగి మేఘమండలమును తాకవచ్చుగాక!
7. కాని అతడు మలమువలె నశించిపోవును. పూర్వము అతనిని ఎరిగియున్నవారు ఇప్పుడు అతడు ఏమయ్యెను' అని ప్రశ్నింతురు.
8. అతడు స్వప్నమువలె మరుగైపోవును. నిద్రలో కన్పించిన దృశ్యమువలె మాయమైపోవును
9. పూర్వము అతడినెరిగినవారు మరల అతనిని చూడజాలరు. అతడు వసించిన గృహమునను మరల అతనిని కాంచజాలదు.
10. అతని సంతతి పేదల దయను కాంక్షింతురు. వారి చేతులు అతని ఆస్తిని తిరిగి అప్పగించును.
11. పూర్వమతని శరీరము యవ్వనబలముతో విరాజిల్లినది. కాని ఇప్పుడది మన్నయి పోనున్నది,
12-13. దౌష్ట్యము అతనికి తీపిగా ఉండెను కనుక దానిని తన నాలుక క్రింద నానబెట్టుకొని జారిపోనీకుండ చప్పరించెను.
14. కాని ఆ భోజనము అతని ఉదరమునకు చేటు తెచ్చెను అది అతని కడుపులో సర్పవిషముగా మారిపోయెను
15. అతడు తాను మ్రింగిన సొత్తునంతటిని కక్కివేయవలసినదే. ప్రభువే అతనికి వాంతి పుట్టించి ఆ సొమ్మును కక్కించును.
16. అతడు నాగుపాము విషమును మ్రింగెను, కనుక విషసర్పము కాటువలన చచ్చితీరును.
17. అతడిక ఏరులైపారుచున్న పాలుతేనెలతో ప్రవహించు నదులనుగాని చూడజాలడు.
18. తాను సంపాదించిన సొత్తునంతటిని విడనాడవలసినదే. తాను కూడబెట్టిన సొమ్మును తాను అనుభవింపజాలడు
19. అతడు పేదలను పీడించి పిప్పిచేసెను. తాను కట్టని ఇండ్లను స్వాధీనము చేసికొనెను.
20. అతని దురాశకు అంతము లేదయ్యెను. కాని అతడు కూడబెట్టిన సొమ్ము ఇప్పుడతనిని రక్షింపజాలదు.
21. ఇప్పుడతనికి తినుటకు ఏమియు లేదు. అతని ఐశ్వర్యమంతయు మంటగలసి పోయినది
22. ఉచ్చదశనందుకొనినంతనే సంకటములు అతనిని చుట్టుముట్టినవి.
23. ప్రభువు కోపము అతనిమీద రగుల్కొనెను. ప్రభువు అతనిపై అమ్ములను ముమ్మరముగా రువ్వెను.
24. అతడు ఇనుపకత్తినుండి తప్పించుకొనినను, ఆ కంచువిల్లు వానిని పడగొట్టకమానదు.
25. అతని వీపున అమ్ము దిగబడును. మిలమిల మెరయు బాణపుమొన అతని పిత్తమున దిగబడును. అతడు భయభ్రాంతుడగును.
26. అతని ధననిధులను అంధకారము కమ్మివేయును. మెరపుతాకిడికి అతని ఇల్లు బుగ్గియగును.
27. ఆ దుర్మార్గుని పాపమును దివి బట్టబయలు చేయును అతడు ద్రోహియని భువిసాక్ష్యము చెప్పును.
28. ప్రభువు కోపము వరదవలె వచ్చి చుట్టుముట్టగా, అతని సంపదలన్ని కొట్టుకొనిపోవును.
29. దుర్జనునికి పట్టెడి దుర్గతి ఇట్టిది. ప్రభువతనికి విధించెడి శిక్ష ఇట్టిది.”
1. తరువాత యోబు ఇట్లనెను:
2. “మీరు నా పలుకులను సావధానముగా విన్నచో నన్ను ఓదార్చునంత పుణ్యము.
3. మీరు మొదట ఓర్పుతో నా వచనములు ఆలింపుడు అటుపిమ్మటనా మాటలకు నవ్విన నవ్వుదురుగాక!
4. నేను వాదమాడునది నరులతోగాదు. నేను తాల్మిని కోల్పోవుటకు కారణమున్నది.
5. నా మాటలను బాగుగా విన్నచో మీరు విస్తుపోయి నోటిమీద వ్రేలు వేసికొందురు.
6. నాకు జరిగిన సంగతులను చూచి నేనే భీతిచెంది, కంపించుచున్నాను.
7. దుర్మార్గుల జీవితము కొనసాగనేల? వారి ఆయుస్సుతోపాటు వారి సంపదలుకూడా పెరుగుటలేదా?
8. వారి సంతానము వృద్ధి చెందుచున్నది. వారి పిల్లలు వారి కన్నులెదుటనే పెరుగుచున్నారు
9. వారి కుటుంబములకు ఎట్టి ప్రమాదము కలుగుటలేదు. దేవుని దండము వారిమీద పడుటలేదు.
10. వారి ఎడ్లు దాటగా తప్పక చూలు కలుగును. ఆ ఆవులు చూడితప్పక దూడలను ఈనుచున్నవి
11. వారి పిల్లలు గొఱ్ఱె పిల్లలవలె పరుగిడుచు, ఆటలాడి నాట్యము చేయుచున్నారు.
12. తంత్రీవాద్యములు మీటుచు, పిల్లనగ్రోవుల నూదుచు, ఆ బాలబాలికలు ఆడిపాడుచున్నారు.
13. వారు తమ దినములను సమృద్ధిగా గడుపుదురు. సమాధానముతో పాతాళమునకు పోవుదురు.
14. అయినను ఈ దుర్మార్గులు దేవుని అలక్ష్యము చేసిరి ఆయన ఆజ్ఞలు పాటించుటకు నిరాకరించిరి.
15. దేవుని సేవింపనక్కరలేదనియు, ఆయనకు ప్రార్థనచేసిన ఫలితము దక్కదనియు భావించిరి.
16. వారు స్వీయశక్తితోనే విజయము సాధించితిమనుకొనిరి. కాని వారి వాదమును నేను ఎంతమాత్రము అంగీకరింపను.
17. అయినను తరచుగా దుర్జనుల దీపము ఆరిపోదేల? వారికి వినాశనము దాపురింపదేల? దైవకోపము వారిని నాశనము చేయదేల?
18. వారు గాలికి గడ్డిపోచవలె, సుడిగాలికి కల్లములోని పొటువలె కొట్టుకొని పోరేల?
19. 'దేవుడు తండ్రి తప్పులకు తనయుని శిక్షించును' అని మీ వాదము. అటులకాదు, తప్పుచేసినవాడే శిక్షను అనుభవింపవలయును
20. దుర్మార్గుడు తన వినాశమును తాను కన్నులార చూడవలయును. దేవుని కోపాగ్నికి తాను స్వయముగా గురికావలయును.
21. నరుడు చనిపోయిన తరువాత తన తనయులు సౌఖ్యముగా ఉన్నారా లేదా అని విచారించునా?
22. కాని మనము దేవునికి బోధచేయు నంతటివారలమా? ఆయన దేవదూతలకుగూడ తీర్పు విధించునుకదా!
23-24. కొందరు చనిపోవువరకు ఆరోగ్యముగా నుందురు." సంతోషముగా కాలము వెళ్ళబుచ్చుచు, కండబలముతో పుష్టిగా ఉండి, నిరాయాసముగా కడన ప్రాణము విడతురు.
25. కాని కొందరు సుఖములకు నోచుకోక, సంతాపముతో ప్రాణములు విడనాడుదురు.
26. అయినను ఆ ఇరుతెగలవారిని ప్రక్కప్రక్కనే పాతి పెట్టెదరు. ఆ రెండు వర్గముల వారిని అవే పురుగులు తినివేయును.
27. మీ మనసులో ఏమేమి భావములు మెదలుచున్నవో, మీరు నాతో ఏమేమి వాదింపగోరెదరో నేనెరుగుదును.
28. 'పేరు ప్రఖ్యాతులతో వెలిగిపోవు వాని భవనమేమైనది? పాపి నివాసము ఇప్పుడెచటనున్నది?” అని మీరడుగుదురు.
29. మీరు దేశదేశములు తిరుగు ప్రయాణికులతో మాట్లాడలేదా? వారి కథనము వినియుండలేదా?
30. ఉగ్రత దినమున నరులను శిక్షించునపుడు దేవుడు దుర్మార్గుని మాత్రము వదలివేయునా?
31. కనుక దుష్టుని నిలదీసి అడుగు వాడెవడులేడు. అతని దుష్కార్యములకు తగినట్లుగా అతనికి బుద్ధిచెప్పువాడును లేడు.
32. దుర్జనుని పాతి పెట్టుటకు కొనిపోయినపుడు చాలామంది అతని సమాధివద్ద ప్రోగవుదురు.
33. వేలాది ప్రజలు అతనికి ముందు వెనుకల నడతురు. అతనిమీద మట్టి పెళ్ళలనుగూడ మృదువుగానే విసరుదురు.
34. కనుక మీరు నన్ను ఓదార్చుటకు వెఱ్ఱివాదములు చేసితిరి. మీ మాటలన్ని పచ్చి అబద్ధములని రుజువైనదికదా?”
1. తరువాత తేమాను నగరవాసి ఎలీఫసు ఇట్లనెను:
2. 'నరుని వలన దేవునికేమి ఉపయోగమున్నది? విజ్ఞానియైన నరుడుగూడ ఆయనకు ఉపయోగపడడు.
3. నీవు ధర్మాత్ముడవైనందున దేవునికి ఏమి లాభము? నీవు పుణ్యపురుషుడవైనందున ఆయనకు ఏమి ఫలము?
4. నిన్ను ఆయన శిక్షించినదిగాని, నీకు తీర్పు విధించినదిగాని నీవు ఆయనపట్ల భయభక్తులతో జీవించుటచే కాదు.
5. అనంతమైన నీ దుష్టవర్తనమునకుగాను, లెక్కల కందని నీ దుష్కార్యములకుగాను నిన్ను ఆయన దండించుచున్నాడు.
6. తోడివారు నీ వద్ద అప్పుతీసికొన్న సొమ్మునకుగాను నీవు వారి బట్టలను కుదువ సొమ్ముగా పుచ్చుకొని వారిని దిగంబరులను గావించితివి.
7. ఆకలి గొన్నవారికి పిడికెడుకూడు పెట్టవైతివి. దప్పిక గొన్నవారికి గ్రుక్కెడు నీళ్ళీయ వైతివి,
8. బాహుబలము కలవానికే భూమి దక్కును. ఘనుడని ఎంచబడినవాడు దానిలో నివసింతురు.
9. వితంతువులను వట్టిచేతులతో పంపివేసితివి. అనాథలకు అన్యాయము చేసితివి.
10. కనుకనే శత్రువులు నీకు అన్నివైపుల ఉచ్చులు పన్నిరి. అకస్మాత్తుగా భయములు నిన్ను ఆవరించినవి.
11. నీ చుట్టు చీకట్లు క్రమ్ముకొనగా నీవు మార్గము కనజాలవైతివి. జల ప్రవాహములు నిన్ను ముంచియెత్తినవి.
12. దేవుడు మహోన్నతమైన స్వర్గసీమన వసించును గదా! ఉన్నతముననున్న నక్షత్రములను అవలోకించుటకు క్రిందికి పారచూచును.
13. అయినను 'అంత ఎత్తున నున్న దేవునికి ఏమి తెలియును. మేఘములు అడ్డుపడుట వలన మనము ఆయనకు కనుమరుగైపోమా?” అని నీవు అడుగుచున్నావు.
14. ప్రభువు ఆకాశపుటంచుల మీద నడచునప్పుడు, గాఢ మేఘములు ఆయన దృష్టిని నిరోధించునని నీవు ఎంచుచున్నావు.
15. పూర్వమునుండి దుష్టులు నడచుచు వచ్చిన దుర్మార్గముననే నీవుకూడ పయనింపగోరెదవా?
16. ఆ నీచులను వారికాలము రాకమునుపే మహాప్రవాహము తుడిచిపెట్టినది.
17. 'మా నుండి తొలగిపొమ్ము. ఆ సర్వశక్తుడు మాకు చేయునదేమి?" అని ఆయన తమ్ము కదిలింపజాలడని వారు ఊహించిరి.
18. అయినను ఆ దుర్జనులను ధనాఢ్యులుగ చేసినది ప్రభువే. వారు మాత్రము ఆయనను తలంపునకు తెచ్చుకోరైరి
19. ఆ దుష్టుల పతనమును జూచి పుణ్యపురుషులు సంతసించిరి. ధర్మాత్ములు మందహాసము చేసిరి.
20. వారి సంపదలు అన్నియు నాశనమైనవి. వారి సొత్తంతయు బుగ్గియైనది.
21. కనుక మిత్రమా! నీవు దేవునితో రాజీపడుము. అప్పుడు నీకు క్షేమము కలుగును.
22. ఆయన ఆజ్ఞలు చేకొనుము. ఆయన ఆదేశమును నీ యెదలో పదిల పరచుకొనుము.
23. వినయముతో దేవుని వద్దకు తిరిగిరమ్ము. నీ ఇంటినుండి పాపకార్యమునెల్ల పోద్రోలుము.
24. నీ బంగారమును ధూళిగానెంచి బయట పారవేయుము. నీ ఓఫీరు మేలిమి బంగారమును ఏటి యొడ్డున దొరకు చిన్నరాళ్ళనుగా భావించి బయటికి విసరివేయుము.
25. అప్పుడు నీకు దేవుడే బంగారమగును. ఆ ప్రభువే నీకు వెండికుప్ప అగును.
26. అప్పుడు దేవుడు నీకు ఆనందనిధి అగును. నీవు ఆయన వైపు తలెత్తగలవు.
27. నీవు ఆయనను వేడుకొందువు, ఆయన నీ మొరాలకించును. నీవు పట్టిన వ్రతములను తీర్చుకొందువు.
28. నీవు తలపెట్టిన కార్యములెల్ల విజయవంతములగును. నీ మార్గమున వెలుగు ప్రకాశించును.
29. గర్వాత్ముల పొగరును అణగదొక్కు ప్రభువే వినయవంతులకు రక్షణము దయచేయును.
30. ప్రభువు నిరోషియగు నరుని రక్షించును. పాపకార్యములకు పాల్పడవేని నిన్ను కూడ ఆదుకొనును.”
1. తరువాత యోబు ఇట్లనెను:
2. "నేనింకను దేవుని కెదురుతిరిగి నిష్ఠురములు పలుకుచున్నాను. నా మూలుగులను అణచుకోజాలకున్నాను.
3. ఆ ప్రభువును సమీపించు మార్గము, ఆయనను చేరుకొను విధానము తెలియవచ్చిన ఎంత బాగుండును!
4. అప్పుడు నా అభియోగమును ఆయనకు తెల్పుకొందును. నావాదములన్నిటిని ఆయనకు విన్పించుకొందును
5. ఆయన తన వాదమునెట్లు సమర్ధించుకొనునో చూతును. ఆయన నాతో నుడువు పలుకులను జాగ్రత్తగా ఆలింతును.
6. ఆయన బలముగా వాదించి నా నోరు మూయించునా? అట్లు చేయడు, నా పలుకులు ఆలకించితీరును.
7. తాను నిజవర్తనునితో మాటాడుచుంటినని ఆయన గ్రహించును. కనుక నేను ఎన్నటికి నా న్యాయాధిపతిచే శిక్షింపబడను.
8. నేను తూర్పునకు వెళ్ళినచో ప్రభువు అచట కన్పించుట లేదు. పడమటికి వెళ్ళినచో అచటను కన్పించుట లేదు.
9. ఉత్తరమువైపు వెదకినచో అచట పొడచూపుట లేదు. దక్షిణపు వైపు వెదకినచో అచటను దొరకుట లేదు.
10. అయిననునా కార్యములన్ని ఆయనకు తెలియును ఆయన నన్ను పరీక్షించినచో నేను నిర్దోషినని తెలియును.
11. నేను ప్రభువు నిర్ణయించిన మార్గముననే నడచితిని కుడియెడమలకు బెత్తడైనను జరుగనైతిని.
12. ఆయన ఆజ్ఞలనెల్ల పాటించితిని. అతని చిత్తమును అనుసరించి జీవించితిని.
13. కాని ప్రభువు సంకల్పమును ఎవ్వరును మార్పజాలరు. ఆయన చేయనెంచిన కార్యమును ఎవ్వరును ఆపజాలరు.
14. కావున ఆయన నాకు చేయగోరిన కార్యమును చేసితీరును. ఆయన ఇతర నిర్ణయమువలె ఇదియు జరిగిపోవును
15. అందుచే నేను ఆయన సమక్షమున భీతితో కంపించుచున్నాను. ఈ సంగతిని తలచుకొన్న కొలది నాకు భయమెక్కు వగుచున్నది.
16. ప్రభువు నా గుండెను నీరు చేసెను. నన్ను భయముతో నింపివేసెను.
17. చీకటి ఆయనను నానుండి మరుగుచేయుచున్నది అయినను నేను తమస్సునకుగాక దేవునికే భయపడుచున్నాను.
1. తరువాత షూహా దేశీయుడు బిల్టదు ఇట్లనెను:
2. “మహాశక్తిమంతుడైన ప్రభుని చూచి ఎల్లరును కంపింతురు. ఆయన ఉన్నత స్థలములో శాంతిని నేలకొల్పెను.
3. ఆయన దూతగణముల నెవడు లెక్కింపగలడు? అతని జ్యోతి ప్రకాశింపని స్థలమెందైనగలదా?
4. దేవుని దృష్టిలో ఏ నరుడైన పుణ్యాత్ముడుగా గణింపబడునా? నారికి జన్మించిన నరుడెవడైన విశుద్ధుడుగా పరిగణింపబడునా?
5. ఆ ప్రభువు దృష్టిలో చంద్రునకు ప్రకాశము చాలదు. చుక్కలకు నిర్మలత్వము చాలదు.
6. అట్టిచో క్రిమియు, కీటకమునైన దుర్బలమానవుడు దేవుని దృష్టిలో ఏపాటివాడు?”
1. తరువాత యోబు ఇట్లనెను:
2. “ఓయి! దుర్బలుడనైన నాకు నీవు ఎంతటి సాయము జేసితివి! బలహీనుడనైన నాకు నీ వెంతటి ఆశ్రయము నొసగితివి!
3. జ్ఞానములేనివానికి నీవెంత మంచి సలహాలిచ్చితివి నా మేలుకొరకు నీ భావములను ఎంత చక్కగా వివరించితివి!
4. కాని నీ మాటలను ఎవరాలింతురు? ఎవరి సాయమున నీవిట్టి పలుకులు పలికితివి?
5. పాతాళ వాసులు గడగడ వణుకుదురు. పాతాళజలములు అందలి భూతములు కంపించును
6. పాతాళమునందలి మృతులు దేవునికి స్పష్టముగా కన్పింతురు. ఆయన కంటికి కన్పింపకుండ వారిని దాచగలిగినది ఏదియును లేదు.
7. ఆకాశ ఉత్తరభాగమును వ్యాపింపచేసినవాడు ఆయనే భూమిని శూన్యమున వ్రేలాడదీసినవాడు ఆయనే
8. ప్రభువు మేఘములను నీటితో నింపును. అయినను అవి జలభారముచే పిగిలిపోవు.
9. ఆయన పూర్ణచంద్రుని మబ్బుతో కప్పివేయును.
10. సముద్రము మీద ఒక వలయమునేర్పరచి, వెలుగును చీకటినుండి వేరుపరచును.
11. ఆయన ఆకాశమును భరించు స్తంభములను గద్దింపగా అవి భీతితో కంపించును.
12. ఆయన మహాబలముతో సముద్రమును జయించెను. నేర్పుతో రాహాబును హతమార్చెను.
13. తన శ్వాసతో ఆకాశమును జ్యోతిర్మయము గావించెను. పారిపోవు మహాసర్పమును స్వహస్తముతో మట్టు పెట్టెను.
14. ఈ కార్యములన్నియు ఆయన బల సూచకములు మాత్రమే. మనము వినునది ఆయన అస్పష్ట శబ్దములు మాత్రమే ఆ ప్రభువు మహాబలమునెవరు గుర్తింపగలరు?”
1. నేను కామదృష్టితో ఏ యువతిని వీక్షింపగూడదని, నా నయనములతో నేను నియమము చేసికొంటిని.
2. ప్రభువు మనకేమి బహుమతిని ఇచ్చును? మన కార్యములకు ఆయనేమి ప్రతిఫలము నొసగును?
3. దుర్మార్గులను నాశనముచేసి దుష్టులను కడగండ్లపాలు చేయుటయేగదా ఆయన పని!
4. నేను చేయు కార్యములన్నిటిని ప్రభువు చూచును. నేను వేయు అడుగులన్నిటిని ఆయన పరిశీలించును.
5. నేను అసత్యబాటలు తొక్కితినా? మోసమునకు ఒడిగట్టితినా?
6. ప్రభువు నన్ను నిర్దిష్టమైన తులాభారముతో తూచెనేని నేను నిర్దోషినని తేలిపోవును.
7. నేను ధర్మమార్గమునుండి వైదొలగితినేని, నా హృదయము చెడ్డను కోరుకొని యుండెనేని, నా చేతులు పాపకార్యములకు పాల్పడెనేని,
8. నేను వేసిన పైరులు నాశనమగుగాక! నేను పండించిన పంటను ఇతరులు అనుభవింతురుగాక!
9. నేను పొరుగువాని భార్యను ఆశించి, వాని గుమ్మము కడ పొంచియుంటినేని,
10. నా భార్య పరునికి కూడు వండి, వాని పడకమీద పండుకొనునుగాక!
11. నేను అట్టి హేయమైనపనికి పాల్పడియుంటినేని, అది మహాదుష్టకార్యమై నన్ను మరణశిక్షకు పాత్రునిచేసెడిది.
12. అది వినాశము తెచ్చి పెట్టు మహాగ్నియై నా పైరులన్నిటిని తగులబెట్టెడిది.
13. నా సేవకుడుగాని, సేవకురాలుగాని తమ గోడును విన్పించుకోగా, నేను వారి మొరను ఆలించితిని.
14. లేదని, నేను ప్రభువు ఎదుట ఎట్లు నిలువగలను? ప్రభువు నాకు న్యాయము తీర్చునపుడు నేను ఆయనకేమి జవాబు చెప్పగలను?
15. దేవుడు నన్ను పుట్టించినట్లే వారినికూడ పుట్టించెను. ఆయనే అందరిని మాతృగర్భమునుండి పుట్టించుచున్నాడు.
16. నేను పేదలను ఏనాడును అనాదరము చేయలేదు వితంతువును ఏనాడును కంటతడి పెట్టనీయలేదు
17. అనాథలకు పెట్టకుండ ఒంటిగా భుజింపలేదు.
18. అనాథలు చిన్ననాటినుండి నన్ను తండ్రివలె భావింపగా నేను వారిని ఎల్లవేళల ఆదరముతో చూచుచు వచ్చితిని.
19. పేదలు బట్టలులేక బాధపడుచుండగా, కప్పుకొనుటకేమియు లేక వేదన పడుచుండగా,
20. నా మందలనుండి తయారయిన ఉన్ని బట్టలను నేను వారికిచ్చెడివాడను. వారు నన్ను హృదయపూర్వకముగా దీవించెడివారు
21. న్యాయసభలో సభ్యులు నన్నే సమర్థింతురన్న ధీమాతో నేను తండ్రిలేని వారికి అపకారము చేసి యుంటినేని,
22. నా ముంజేతులు మోచేతి కడకు విరిగిపోవుగాక! నా భుజములు జారిపడునుగాక!
23. దేవుని శిక్షకు వెరచువాడను గనుక, నేనట్టి చెయిదమునకు పాల్పడి ఉండను.
24. నేను బంగారమును నమ్ముకోలేదు. మేలిమి బంగారముమీద ఆధారపడలేదు.
25. నా చేతులు కూడబెట్టిన మహాసంపదలుచూచి నేను ఏనాడును మురిసిపోలేదు.
26. దీప్తిమంతముగా మెరయు సూర్యబింబమును జూచిగాని, సుందరముగా వెలుగు చంద్రబింబమును గాంచిగాని
27. హృదయ ప్రలోభమునకు గురియై వాటికి నేను చేతులెత్తి దండము పెట్టలేదు.
28. అట్లు చేయుట క్షమింపరాని నేరము అది సర్వోన్నతుడైన ప్రభువును నిరాకరించు చెయిదము.
29. నా విరోధుల కడగండ్లు చూచి నేను సంతసింపలేదు. వారికి కీడు వాటిల్లగా పొంగిపోలేదు.
30. వారు చావవలెనని శాపవచనములు పలికి నా నాలుకతో పాపము మూటగట్టుకోలేదు.
31. నేను ఎల్లప్పుడు అతిథులకు ఆతిథ్యము ఇచ్చెడివాడనని 'నేను పెట్టిన భోజనము తిని తృప్తినొందని అతిథులు లేరు' అని వారికెల్లరికిని తెలియును.
32. వీధులలో రేయి విడిది చేయవలసిన అవసరము లేకుండ బాటసారులను ఏ ప్రొద్దు అయినను నా ఇంటికి ఆహ్వానించెడివాడను.
33. నేను ఇతరులవలె నా దోషములను కప్పి పెట్టుకోలేదు. నా పాపములను నా యెదలోనే పదిలముగా దాచుకోలేదు.
34. ఇతరులు ఏమనుకొందురో అని భయపడలేదు. జనుల అపవాదమునకు వెరచి మౌనము వహింపనులేదు. ఇల్లు కదలక ఉండనులేదు.
35. నా పలుకులు ఆలించువారెవరును లేరా? ఇదిగో నా చేవ్రాలు. ఇదిగో నా ప్రత్యర్థికి వ్రాయవలసిన ఫిర్యాదు పత్రము, ప్రభువు నాకు బదులు చెప్పును గాక!
36. నా ప్రత్యర్థి నా నేరములను వ్రాసి చూపెనేని, నేను నిశ్చయముగా వానిని నా భుజములకు కట్టుకొందును. తలపాగావలె నా శిరస్సునకు చుట్టుకొందును.
37. నేను చేసిన కార్యములెల్ల నా ప్రతిపక్ష వ్యక్తికి ఎరిగింతును. తన ఎదుట ధైర్యముతో తలయెత్తుకొని ఠీవితో నిత్తును.
38'. నేను ఇతరుల పొలమును ఆక్రమించుకోగా, ఆ పొలము నన్ను తిట్టిపోసి, కన్నీటితో తన నాగటి చాళ్ళను నింపుకొనెనేని,
39. ఆ పొలమున పండిన పంటను నేను అనుభవించి దానిని పండించిన రైతుల కడుపు కొట్టితినేని,
40. ఆ పొలమున నేడు గోధుమలకు మారుగా ముళ్లపొదలును, యవపైరుకు మారుగా కలుపు మొక్కలు ఎదుగునుగాక! (ఇంతటితో యోబు పలుకులు ముగిసినవి)
1. ఆ ఉరుములు గర్జన రాగానే నా గుండె వేగముగా కొట్టుకొని గడగడ లాడుచున్నది.
2. మీరెల్లరు ప్రభువు స్వరము వినుడు. ఆయన నోటినుండి వెలువడు గర్జనమును ఆలకింపుడు.
3. ఆయన ఆకాశమునుండి మెరుపులు పంపును. అవి నేలకొనల వరకు ప్రసరించును.
4. అటు తరువాత ఆయన స్వరము విన్పించును. అది ఉరుముల భీకరధ్వానము. మెరుపులు మాత్రము నిరతము మిరుమిట్లు గొలుపుచునే ఉండును.
5. ప్రభువాజ్ఞ ఈయగా అద్భుతకార్యములు జరుగును ఆయన మహాకార్యములను మనము అర్థము చేసికోజాలము.
6. ఆయన ఆజ్ఞాపింపగా నేలమీద మంచుపడును. వర్షము కురిసి భూమి జలమయమగును.
7. ఆయన నరుల కార్యములను స్తంభింపజేసి వారు తన శక్తిని గుర్తించునట్లు చేయును.
8. వన్యమృగములు పొదలలో దూరి, గుహలలో దాగుకొనును.
9. తుఫాను గాలులు దక్షిణమునుండి వచ్చును. చలిగాలులు ఉత్తరమునుండి వచ్చును.
10. దేవుడు తన ఊపిరి నూదగా నీళ్ళు చల్లనై మంచుగా మారిపోవును.
11. ఆయనే మబ్బులను నీటితో నింపును. వాని నుండి మెరుపులు మెరయును.
12. ఆయనే స్వయముగా ఆ మబ్బులను నడిపింపగా అవి ఎల్లయెడల తిరుగాడును. నేల నాలుగుచెరగుల సంచరించును. అవి ఆయన ఆజ్ఞను ఖండితముగా పాటించును.
13. నేలమీది నరులను శిక్షించుటకుగాను కరుణించుటకుగాను ఆయన మబ్బులను పంపును
14. యోబూ! ఒక్క క్షణము ఈ సంగతులెల్ల ఆలోచింపుము. ప్రభువు అద్భుతకార్యములను పరిశీలించి చూడుము.
15. దేవుడు ఆజ్ఞ ఈయగా మబ్బులలో నుండి మెరపులెట్లు మెరయునో నీకు తెలియునా?
16. దేవుని అద్భుతకౌశలము వలన మేఘములు ఆకాశమున ఎట్లు తేలియాడునో నీ వెరుగుదువా?
17. దక్షిణపు గాలి తోలి, నేల అట్టుడికినట్లు ఉడికిపోవునపుడు, నీ బట్టలు వేడియైనది నీకు తెలియదా?
18. దేవుడు ఆకాశమును విప్పారజేసి దానిని లోహపు దర్పణమువలె కఠినము గావించెనుగదా! మరి ఆ క్రియలో నీవు ఆయనకు సహాయపడగలవా?
19. దేవునికేమి చెప్పవలెనో నీవే తెల్పుము. మాకు ఆలోచనలు తట్టుటలేదు, మా నోట మాటలు రావు.
20. నేను మాటాడుదునని ఆయనతో ఎవడైన చెప్పునా? ఒకడు తాను నిర్మూలము కావలెనని కోరుకొనునా?
21. కొన్నిసారులు కారుమబ్బులడ్డుపడుటచే ఆకాశమునుండి వెలుగు ప్రసరింపదు. కాని ఇప్పుడు గాలివీచి మేఘములను తోలివేసినది ఆకాశము కాంతితో తళతళలాడుచున్నది.
22. ఉత్తరమున సువర్ణచ్ఛాయ వెలుగొందుచున్నది. దేవుని తేజస్సు మనలను భయభ్రాంతులను చేయుచున్నది.
23. మనము అగోచరుడైన ప్రభువును సమీపింపజాలము. ఆయన మహాశక్తిమంతుడు, ధర్మమూర్తి నీతినతిక్రమింపడు. నరులను న్యాయముతో చూచువాడు.
24. కావున ఎల్లరును ఆయనను చూచి గడగడలాడుదురు మేము జ్ఞానులమనుకొను వారిని ఆయన లెక్కచేయడు